Pünktlech zur Abfahrt vor Fähre hets aagfange rägne. I bi glich no uf z Sundeck (höhö, heisst würklech so) go luege, wimer dräüte Kanau bis id Oschtsee füre so gfahre. Bevor i düregnesst bi gsi, hani de mi Sässu gsuecht – dä isch wider erwarte rächt bequem gsi, und wüui keni Nachbar*inne ha gha und si jedi zwöiti Reihä usemontiert hei, hani sehr viu Platz gha. Schnäu hani usegfunge, wis uf sore internationale Fähre louft: Duty free Aukohou. Da hets mi zersch o nid erstuunt, dass d Lüt nid würk komsequent Maske treit hei, nid z letscht het ja o Zertifikatspflicht guute a Bord. Weni denn gwüsst hät… I bi ömu unger fragende Blicke mini Zähn go putze. Und schlafe hani när ou chönne – we ou nid so lang, wüu z Schiff überpünktlech am haubi Sächsi z Trelleborg isch aacho. Im Dunkle hani de mit de füf angere Fuesspassagier*inne dr Bahnhof gsuecht. Via Malmö bini uf Göteborg gfahre, ungerwägs hani mer natürlech scho mau mi erscht Zimetschnägg gönnt 😁 Und drzue widermau es Kafi mit Gschmack! I has fasch nid gloubt: z Schwede giutet niene me Maskepflicht. Zug, Tram, Bös, Läde & Restaurants; überau hani zersch d Maske zückt, bevor i chegget ha, dasi gar nid müesst.
Nachdäm i Göteborg chli unsicher gmacht ha, bini mau go probiere, wi si hie Indisch chöi choche (Fazit: Rächt guet). D Hemmige allei go z ässe hani zum Glück scho z Dütschland chönne abboue, u simer ehrlech: es fägt eigentlech rächt! Morn hani z Umland vo Göteborg im Visier, bevors de mitem Nachtzug witergeit.
😉