wider am Meer 🌊

Am Samschti nachem Mittag simer widermau losgfahre. Nach öppe 24 Stung (wobii mer d Heufti vo dere Zyt ufemne Steuplatz verbracht hei) simer z Biscarrosse aacho – u natürlech zersch mau ads Meer 😊 (dasmau simer am grosse Meer)

nachdäm heimer üs chli iigrichtet – mir si ufemne Steuplatz im Piniewaud, öppe 300m vom Meer entfärnt. Sehr schön da – u o chli di einzigi Option, d Campings hie ir Region si aui scho zue.

für z Zmittag simer z Dörfli go erkunde – gässe heimer guet, süsch giz näbscht em Meer nid viu z gseh 😄 So simer de no go iichoufe, a Strand go aperööle, Znacht choche u scho glii iz Bett.

Hüt morge simer mitem Surfbrätt loszoge, und nachere churze Instruktion vom Pascal bini tatsächlech zum erschte mau go sörfe – auso uf z brätt gläge und umepaddlet. Ufstah chani natürlech nid. Aber het gfägt!

Nachem Zmittag simer mit dä Velos zur Dune du Pilat gradlet, s het ä sehr schöne Velowäg am Meer entlang u düre Waud.

D Düne het mi ehrlechgseit mässig dünkt. Weme sä vo witem aaluegt isch si sehr beiidruckend, aber weme ufegstige isch u dobe steit merkt mä gar nid, wi gross si isch!

Zrügg bim Platz simer nomau az Meer u hei kitschige Sunneungergang verwütscht.