Fasch dehei ☹️

A üsem letschte Tag simer mit dä Schii übere Fluss gfreeset. Im Dorf hets ä chliini Loipe (es öppe 2.5km längs 8i) womer no hei wöue go teschtä. När heimer iikouft, si wider hei, u heis üs im Hüttli gmüetlech gmacht – s isch bedeckt gsi u het gschneit. Für üsi Abschlussparty heimer dusse es füür gmacht u brätlet 🥰

Hüt simer de z Rovaniemi Flughafe. Dört heimer zimlech müesse aastah, het aber guet glängt. Nume blöd, dasmer 1h 20min zspät si abgfloge. Wüu am Morge ä Flug vo Rovaniemi uf Tromsø wider het müesse zrüggcho, het öppis mit dä Passagier:innedate nid gstumme. U wäg däm heimer nid chönne gah. Irgendeinisch hei si ds de chönne löse, nume het när no öpper müesse di richtige Date UF PAPIER iz Flugi bringe – drum nomau Verzögerig. När simer de los, und mir si zueversichtlech gsi, dasmer dr Aaschluss z Helsinki verwütsche – dasmau heimer 1.5h Umstigezyt gha. Het auso glängt, dr zwöit Flüger isch o chli zspät los. Z Gänf simer de numeno öppe 30 Minute z spät gsi. U mir hei scho dänkt, dasmer üse Zug verpasse, wüume ja aube uf z Gepäck mues warte. Aber voilà: Mitem Airtag, wo dr Papa i sim Rucksack het (mit däm bini ungerwägs gsi), heimers de schnäu gmerkt – und Finnair het üs ou scho währendem Flug es Mail gschickt gha:

Genau, üses Gepäck isch no z Helsinki! Hets leider nid i zwöit Flüger gschafft. Aber soo schlimm isch ds gar nid: Es online-Formular usfüue, u scho isches erlediget. Vode Ruckseck heimer sogar scho d Bestätigung, dass si sä hei – dr Schiisack isch äuä amne angere Ort, chunnt aber sicher ou no füre. Üs hets drfür ufe Zug glängt, u z Gepäck wird üs heigliferet. Auso müessemer nid säuber schleppe, und ou no grad nid wösche.. Chasch eigentlech gar nüt säge! Vorusgsetzt, es chunnt de ou glii bi üs a. Mir hei ömu beidi nüt dinne, womer dringend bruuche.