Mir heis auso no witer probiert mit sörfe – dr Pascal chunnt ömu drus, ig nid würklech. Aber es fägt, o weni nid cha ufstah uf däm ding! Mä cha sech ja ufem Buuch la mittribe vode Wäue. U ou ohni Brätt fägts, chli ide Wäue umezturne 😊 Vorgeschter simer im Dorf no go Znacht ässe.
Geschter simer när witer uf Capbreton/Hossegor. Dört simer ufemne Platz grad am Meer gsi – chli luschtig zwüsche au dä aute Lüt mitem Camper, aber tiptop 🙂 U unerwartet isches no ä schöne Aabe gsi, obwous eigentlech viu Räge gmäudet het. Dä isch zum Glück ersch am 9i cho, so heimer no tiptop dusse chönne choche u ässe. Und es Highlight: Bis iz heimer immer miter Duschbruuse vom Bös duschet – chaut, u wüumer i däm Piniewaud si gsi natürlech ohni Dusch. Z Capbreton hets Outdoorduschine gha mit Abfluss, so heimer widermau chönne d Haar schön iischamponiere. Aber chaut isches geng no gsi..
Hüt simer z Hossegor no id Outlet-Zone. Dört hets unändlech viu Surf- uns Chleiderläde. Aber kouft heimer de glich fasch nüt.
Iz simer witer uf Biarritz. Hie heimer zum erschte mau ä Camping gnoh, wüus süsch nüt guets het. So heimer sogar widermau warm duschet!!
D Stadt hout üs mässig ab, drum fahre mer morn de äuä scho wider witer 🙂
Hallo liebe kai u liebe pascal! Schön, dass i chli cha mitverfolge, was dir so machet! Super dini infos kai, danke. Jo do geit öpis. Eifach bim surfe dranne bliebe kai. Das isch sicher nid so eifach wies usgseht. I wünsche euch witerhin gfreuti, erläbnisrichi ferie mit aber ou gnue erholig! Ganz liebi grüess nach frankreich euch beidne vom ursi/mami.
Liebe Kaíliebe Pascal´i freue mi Hit ers guet´danke für e Bricht´Häbets weiterhin schön u guet, Liebi Grüess Grosi