Médoc

Z Meer isch zum Glück würk wider ä chli weniger wiud worde, u so hani nach zwöi täg ungerbruch ändlech wider chönne bade!😮‍💨 Z Vieux-bouceau simer am Friti de no ume See grennt. Dört hets hönne viu Lüt gha, wüu am Samschti ä Triathlon het stattgfunde. Womer si witergfahre, heimer de o dr eint oder anger ufem Velo überhout!

Am friti heimer ou widermau ä schööne Sunneungergang verwütscht:

Am Samschti simer witer id Médoc-Region, auso oberhaub vo Bordeaux. Zum Teil simer dür zimlech abbrönnti Wäuder gfahre. D Füür dä Summer hei im Landesinnere würklech viu zerstört.

Ei Nacht heimer in Le Porge verbracht, ufemne Camping im Waud, grad hinger dä Düne. Im Summer gäbs da es paar Restaurants au Bars am Strand, iz isch aues chli usgstorbe gsi u mir fasch allei ufem Camping.

Nachdäm simer uf Lacanau gfahre für zwöi Nächt – dört isch no chli meh los gsi, wobii ou dört sehr fescht Näbesaison (oder zum Teil scho Winterpouse) isch. Da simer unger angerem no ufne Velotour dür d Wäuder – s het erstuunlech viu Velowäge hie 😊 U isch no luschtig uf somne Streife düre Waud z freesä.

Hüt simer zu üsere letschte Station gfahre: Montalivet-les-bains. Dört heimer ä tolle Platz aapeilet, fasch am Strand. Womer si aacho (im Räge) isch ä Zedu ar Reception ghanget, dass si hüt u morn usnahmswiis zue hei. Zum Glück heimer no ä angere Platz gfunge. Süsch isches hie zimlech usgstorbe, es isch aues zue u het praktisch ke lüt meh. Aber z Meer isch no da 😊 Nume isch z Wasser mittlerwile chli chüehler worde. Am Aafang vo üsne Ferie sis zum Teil no 21° gsi, mittlerwile schiins numeno 17. Aber bade dueni natütlech immerno jede Tag!

Zum Znacht heimer zum Glück de no ä Beiz gfunde, wo offe het 😋