Zarautz & Rägä

Eigentlech heimer nume zwöi Nächt z Zarautz wöue blibe. Wüus üs aber so gfaue het, heimer no ä Nacht verlengeret. Am Sunnti heimer ä Velotour gmacht. Zersch simer uf Zumaia gfahre, dört hets rächt iidrücklechi Klippe, womer hurti ufegloffe si. Mau öppis angers aus breiti Sandstränd. Und ufem Rückwäg heimer no imne Fischerdörfli ghaute und ä Glace gässe. Am Aabe simer de abe a Strand u hei ar Promenade Znacht gässe.

Am Mänti heimer de när witer wöue – u heinis de spontan entschide, no ä witeri Nacht z Zarautz aazhänke. Vo dört chame nämlech miteme Zügli ire Haubstung uf Donostia/San Sebastian fahre. Dört simer a dä berüehmt Strand (wobii dä iz im Verhäutnis zu Frankriich nid würklech schön isch..) und när id Autstadt. Dört hets ei Tapas-Bar ar angere. U när loufts so, dasme vo Bar zu Bar geit, öppis chliises isst (aus vegi isch d uswau leider winzig – im Durchschnitt hets uf 20 Tapas 1-2 vegi-Variante gha) und ds dusse im stah isst – mitemne Glas Wyy. Geit es zytli bisme gnue gässe het, aber het Spass gmacht 😊

Am Zischti simer de glich mau witer – zrügg uf Frankriich, wüus z Nordspanie viu Räge gmäudet het di nächschte Täg. Mir si wider ufe Platz z Capbreton, womer scho letscht Wuche si gsi. Ou hie hets Räge u Gwitter gmäudet, di si aber ersch öppe am 10i am Aabe de würklech cho. Vorgeschter Vormittag hets grägnet, drum simer vorauem dinne am läse, fernsehluege u choche gsi. Nachem Zmittag simer go jogge, u när hätti eigentlech wöue bade. Aber s isch so stürmisch gsi, dasesmer z gfährlech isch gsi. Drum simer när ire Rägepouse mitem Velo uf Hossegor, hei dört Chueche gässe, chli umespaziert u när go Pizza ässe 😋 Ufem Rückwäg simer de ufem Velo schön verrägnet worde, zum Glück nume churz. U wüus drzue gluftet hez, simer o schnäu wider (fasch) troche worde 😁

Geschter simer wider witergfahre bis uf Vieux-Bouceau-les-Bains. Viu gmacht heimer o nid: Läse, ässe, spaziere, am Strand hocke, z Dörfli erkundige.. S het hie ä chliine Sauzwassersee, dä gömer de hüt gnauer go aaluege. Zum Znacht heimer es Cherzli-Raclette gmacht – s isch nämlech scho chli chüehler worde aus di letschte Täg, da passt das natürlech tiptop 😋

Und de wetti hüt ändlech wider im Meer go bade – s het bis geschter geng no viu z starchi wäue gah zum drigah. Hüt sötts aber ändlech besser wärde!