meh Meer!

Nach Biarritz simer witer i Richtig Spanie düüset. Ungerwägs heimer z St-Jean-de-Luz ghaute und dört z Fort u dr Hafe aagluegt.

Aus nächschts simer uf Hendaye, dört heimer nomau chli probiert z surfe. U när simer de über d Gränze und uf Zarautz gfahre. Hie simer ufemne Camping ufem Hoger. U mir hei dr perfekt Platz brcho – mit Morge- und Aabesunne, u sogar chli Meersicht. Dr Strand z Zarautz isch riesig und o sehr schön.

Nachem Zmorge ir Sunne simer hüt abe a Strand – s het gueti wäue gmäudet gha. Auso gnue höchi, aber nid grad 3m wimers o scho gseh hei (da würdi mi de nid inegetroue). Hüt hani mir mau es Aafänger-Surfbrätt gmietet – chli es grössers wo meh Uftrieb het. U so hani tatsächlech paar mau chönne ufstah u fasch chli surfe 😁 Zmittag heimer es Restaurant gfunge, wo ä ganzi vegi/vegani Tapascharte het. Heimer üs düreprobiert, seeeehr fein gsi!

Nach däm länge Tag ufem Meer simer zimlech flade, hei no Znacht gmacht u gniesse dr Aabe. Eigentlech hets widermau Rägä gmäudet, aber dä chunnt einisch meh zum Glück nid!