Töifschneeschueh

Am Donschti simer i üsem letschte Hüttli aacho. Öppe 20km vor Rovaniemi simer imne tiny house am Fluss – super füre Abschluss. D Ussicht isch einisch meh super, u wider erwarte isch sogar richtig guets Wätter gsi. Mir si de no ufene churze Spaziergang – viu z erkunde giz hie ie nechere Umgäbig nid. Gägene gmüetleche Aabe am Füür heimer aber natürlech o nüt iizwände gha 😁 U was a däm Hüttli hie bsunders fägt: Dür di grosse Fänschter gseht me d Nordliechter grad usem Bett use!

Hie hets zwöi paar Schneeschueh, womer dörfe bruuche. Das lömer üs natürlech nid la entgah. Wanderwäge oder Schneeschuehtrails gits nid würklech, drum heimer chli müesse improvisiere. Zersch simer ufem gfroornige Fluss gloffe. Dört druffe wird ou g‘langlöiflet u Schneetöff gfahre.

Üses Ziu isch es 230m höches Högerli gsi. Lut Pascal sim Outdoor-App giz dört ä Schneeschueh-Rundgang. Het leider nid gstumme, auso simer eifach druflos dr Hoger ufe düre Töifschnee. Het o gfägt (ömu für mi😁). Zum Teil simer fasch zur Heufti im Schnee gstange. D Ussicht obe isch drfür de wider schön gsi! Und füre Rückwäg heimer ufere angere Site vom Högerli de sogar ä Schneetöff-Spur gfunge, so isches chli besser gange.

Am Aabe simer de no go iichoufe, und üsi Gaschtgäber:inne hei üs früsches Trinkwasser bracht. Z Hahnewasser (bzw. für üses Hüttli isches ou usemne Tank) isch sehr isehautig u schmöckt dum chli so, wi weme im Muu blüetet. Gfährlech wärs nid.

Ir Hütte näbedranne isch grad es Päärli vo Bärn ide Ferie, dr Jürg ud Beatrix. Mit dene simer scho womer si aacho vorem Supermarkt iz Gspräch cho. Am erschte Aabe isch dr Jürg plötzlech cho chlopfe u het gseit, ihri Sauna wäri no warm für üs.. Mir hei denn grad fertig kochet gha u hei drum abglähnt – geschter hets de passt, u so heimer glich nomau ine Sauna chönne 😁 Dasmau chli rustikaler u mit Füür gheizt. U am Aabe heisech einisch meh d Nordliechter zeigt 🙂

Iz heimer hüt nomau ä letschte Ferietag – morn Mittag gömer wider hei ☹️