Fasch chli Früehlig

Di letschte zwöi Täg heimer mehrheitlech ufder Loipe, i Kafis, Restaurants und ir Sauna verbracht. Abem Zischti het z Wätter chli umgschlage. Es isch immer mau wider chli bewöukt gsi, drfür „nume“ no -10° bis -15°. U da heimer de gmerkt, wi schnäu me sech aagwöhnt. Plötzlech heisech -13° scho fasch warm aagfüut! Und so isch de ou öppis passiert, wo abgseh vor Sauna nonid isch vorcho i üsne Ferie: Mir hei gschwitzt! Vorhär simer aube mit Thermoshirt, Fleece und Jagge go langlöifle – geschter hani no es T-Shirt und z Jäggli aagleit, das het definitiv glängt. 😅

Übrigens isch trotz Wuuche sehr hüüfig ou d Sunne fürecho! Di weniger töife Temperature si ou zum langlöifle super: dr Schnee rütscht besser, und so simer viu schnäuer vorwärts cho aus vorhär. So simer zimlech umecho, und hei nomau nöii Teilä vor Gägend hie erkundiget.

Bsunders Spass mache natürlech ou d Pouse ide Loipekafis – ufem Biud mitemne Piuz-Pancake und Suppe. Und heisse Beeri-Saft 😁 Am Zischtiaabe simer de nachder Sauna go Znacht ässe u när no chli i Usgang – viu Bars hets nid, mir si de imbe Karaoke-Pub glandet, wo viu ü50 Finn:inne gsii si und immer mau wider es paar finnischi Lieder gsunge hei. Verstange heimer natürlech gar nüt, aber gsunge hei di meischte ächt sehr guet!

Geschter simer de no ufne Hoger ufe gfahre. Nidmau 500 Meter höch.. aber geniali Ussicht: 360° Blick i d Witi. Sogar bis uf Schwede heimer gseh.

Am Aabe hättemer de eigentlech wöue choche. Dummerwiis hani per Zuefau gseh, dass z mit Abschtand am beschte bewärtete und vo aune ide höchschte Tön globte Restaurant no ä Tisch frei het – aso heimer eigentlech ke Wahl gha 🤷🏼‍♂️ Auso heimer deheime gmüetlech sauniert (zum letschte Mau – ab iz heimer de keni meh🥹) u si de losgfreeset mit üsne Kicksleds. im Restaurant hets nume 5 Tische, und s isch eigentlech geng usbuechet – äuä het öpper storniert gha. Glück für üs! Gfüehrt wirds vomne Päärli, är chochet, si isch Gaschtgäberin. Und was söui säge – scho lang nüm sooo guet gässe 😍 Eigentlech fasch Fine Dining, nume nid zu däm Priis. Ä super Abschluss z Äkäslompolo. Iz reise mer nämlech wider witer – i di letschti Ungerkunft. Am Sunnti flüge mer vo Rovaniemi us hei. Dört häre heimer aber nid wöue, drum heimer iz 15km usserhaub nones Hüttli buechet für drü Nächt.