Äkäslompolo 🇫🇮

Mir si nomau ire nöie Landschaft aacho. Hie hets iz ändlech di verschneite Tanne-Märliwäuder. Und mir hei es Hüsli zmitts drinne! Natürlech wider mit Cheminée und Sauna 😋

Zum Hüsli ghöre zwöi Kicksleds – im Prinzip ä Mischig zwüsche Schlitte, Trottinett u Schlööf. Gseht de öppe so us:

Nachem Znacht und der Sauna bini widermau use go luege, ob äch öppis lüüchtet. U mis Gspüri isch super gsi! Nomau krasseri Liechter aus z Kilpisjärvi – z Aurora App het im Nachhinein ä „sunstorm“ gmäudet. Überau Liechter, i verschidnige Farbe u so richtig häu – dasmau hetme sehr guet gseh, wi si tanze. Mir si zimli üeberwäutiget gsi!

Geschter simer de mit dä Langloufschii los – z Ylläs-Gebiet (het ou ä grosse Nationalpark) isch z gröschte Langloufgebiet z Finnland. Gloub über 300km. Wüus so chaut isch, häbt dr Schnee leider o chli – hüt heimer grad vore Verchöiferim im Sportgschäft glehrt, dass d Lüt hie ersch ab -15° gö go langlöifle – wes cheuter isch gönge nume d Touris 😉 Het aber sehr gfägt dür d Wäuder z freesä. U es isch super Wätter gsi! Zwüschinne hets immer mau wider Loipekafis, wos ou mi gliebt hot berry juice git. Und geschter heimer Piglet-Donuts mit Öpfufüuig gässe 😋

Am Aabe simer im Dörfli (viu hets nid: Paar Hotels, Restaurants, Sportgschäft und ä Lade) go Burger ässä. Hie hets meh Lüt aus bishär – wägde Loipe undem Skigebiet, wos ou het. So ghört me ou immer wider chli züridütsch 😅

U iz zu däm Skigebiet: Z Ylläs Ski Resort isch z gröschte Schiigebiet vo Finnland. Auso würk Wintersport-Hotspot. Wobii, ds Schiigebiet.. Mir si ds natürlech go teschte hüt. Im Dorf heimer Schii gmiete u si mitem Bös zude Lifte. Im Prinzip isches eifach ei Hoger, und uf beidne Site hets paar Bügulifte näbenang. Und eis Sässeli, wo öppe 400m läng isch – und ei Gondelibahn, di isch aber nach üsere erschte Fahrt de grad kaputt gange. Zum Glück simer denn nüm dinneghocket – gloub paar Lüt hei lang müesse warte.. D Pischte si o chli weniger guet aus z Saanemöser – u leider hets o zum Teil chli Näbu gha hüt. D Ussicht isch glich super gsi, und definitiv es tolls Erläbnis gsi.