Umefreesä

Geschter heimer chli es speziellers Programm gha. Und zwar simner ufne Schneemobil-Tour. Ds Ganze isch eher tüür, aber mir heinis de schlussändlech doch drzue la häreriisse. Wemer scho mau hie si..😁 Zersch mau berchunnt me für das es nöis Outfit. Ä Overall, när ä Mantu drüber. U das über der Thermoungerwösch, Fleece und dicke Jagge, womer säuber scho gha hei (und wimer süsch aube ungerwägs si). Drzue gfüetereti Stifu, dicki Händsche, ä Maske und ä Heum. Ir Garderobe simer fasch gschmuuze, und o dusse isches mit däm Outfit seehr warm gsi. Mir si aber scho drvo usgange, dass d Lüt wo d Tour aabiete wärde wüsse, wases so aues brucht.

Leider heimer vor Tour und üsne Outfits nid so viu Föteli – üsi Guide het miter Kamera gfötelet, di Biudli brchöme mer de no.

Nachere churze Instruktion simer losdüüset. Z fahre isch gar nid so schwirig, mängisch rütschts eifach chli. Zersch simer übere See gfreeset – u hei schnäu gmerkt, dass di vile Schichte würklech nötig si 😄 d Handgriffe (die zum stüüre und die für dä hingedruffe) si zum Glücke düre Motor gheizt, süsch würde eim d Finger abfrüüre 🥶 Üses erschte Ziu isch z nördlechschte Drü-Länder-Egg vo Europa. Dert gö im Winter aui Schneemobiltoure häre und im Summer wandere viu Lüt hingere. Aber ja, schlussändlech isches nid meh aus ä Stei 🤷🏼‍♂️ Weisi iz o nid wo dr Reiz gnau ligt. Chli über imaginäri Linie hüpfe.. Z luschtigschte dranne isch öppe no d Zytverschiebig, wüu Finnland ja e Stund voruus isch. Und mir si dür das ömu am nördlechschte Punkt vo ganz Schwede gsi 😁

Aber d Landschaft rundume isch natürlech super gsi! No besser isches worde, womer id Tundra-Landschaft ide Höger obe si gfreeset. Witer obe hets nid nume meh Sunne, sondern s isch generell wermer. Üsi Guide wohnt z ganze Jahr z Kilpisjärvi (eini vo nume 130 Lüt), si het no viu interessanti Sache verzeut. Dr See isch öppe 8 Mönet pro Jahr gfroore, Mitti Juni sig z Iis aube furt. Im Momänt isches 65cm dick – i hamer irgendwie meh vorgsteut. Dä Winter sig bsunders chaut, es sig eher ungwöhnlech, dases so viu Täg mit um di -30° git. Am 1. Januar hei si -40° gha, das isch dr Saison-Rekord. Im Summer heige si zwüsche 2° und 30°, cha auso sehr ungerschidlech si.

D Tour isch würk super gsi – z einzig närvige isch ä Reisegruppe gsi, wo isch mitcho. Di hei ar Guide nid zueglost und drum ab und zue nid chegget, was si iz sötte mache. U di einte hei de no fasch ä Unfau boue – zum Glück isch nüt passiert. Insgesamt isches sehr ä tolli Erfahrig gsi – z fahre fägt, mir hei paar Sache glehrt und einisch meh schöni Landschaft gseh 😊

Vorem Znacht simer nomau mit dä Langloufschii um d Haubinsle gjuflet, när ab id Sauna und de imne Hotel ir Nechi go Znacht ässä. Di hei es Vegi-Lappland-Menu – sehr fein, nume mis frittierte Bohne-Bäueli isch chli tuoche gsi. Nachem Ässä heimer einisch meh Nordliechter gseh – a die vom erschte Aabe hie isch bis iz aber nüt härecho 😄 Iz fahre mer mitem Bös witer uf Äkäslompolo. Di einzigi Böslinie hie isch die vo Tromsø uf Rovaniemi, womer scho vor paar Täg gnoh hei. Z Kilpisjärvi muesme Bös wächsle – vom norwegische ufe finnisch. Bim fahre merke mer iz definitiv ä Ungerschiid – d Strass isch houpriger und hügeliger aus uf der norwegische Site. Und d Fahrt isch zimlech rasant – dr Fahrer würkt aber sehr routiniert. Vo däm här bini sehr zueversichtlech 😄

Ir Zwüschezyt si no grad d Föteli vor Tour geschter aacho: