Nordliechter u gfroorni Wimpere

Churz nach der finnische Gränze ligt Kilpisjärvi. Hie simer vo rund -20° und viu Schnee empfange worde. Aus erschts heimer üses Hüttli bezoge – sehr härzig, mit Cheminée und ere eigete Sauna 🥰 U när simer i Lade, wüumer Hunger hei gha. Dä isch scho fasch eher es iichoufszäntrum – s git gloub öppe aues dört inne. Sicher ou, wüu Lüt vo Norwege hie über d Gränze chöme. Z Dörfli isch nämlech winzig, u z Gebiet atr Strass sehr dünn besidlet – wenn überhoupt.

Nachem Ässä heimer de ändlech üsi Langloufschii wöue bruche. Leider hei di meischte Loipe hie obe ersch abem März offe – ä schöni Route ufem gfrornige See um d Haubinsle isch aber präpariert. Auso simer losdüüset, u s isch seehr schön gsi ungerwägs. Natürlech o chli chaut, grad am Aafang. Für mii geits erstuunlech guet, dr Pascal het chli meh Müeh. Wimpere, Ougebraue, Stirnfranse u Nasehaar gfrüüre nach paar Sekunde ii, aber mä gwöhnt sech ou a das 😄

Nachem Langlöifle hätte mer eeeigentlech wöue id Sauna hocke u choche. Obwohl d Prognose fasch bi Null si gsi, bini de hurti use go luege, wüu dr Himmu so klar isch gsi. U tatsächlech hani chli Nordliechter gseh. När sis plötzlech viu meh worde u dr Himu immer häuer – u das churz nachde 7i. Süsch mues mä hüüfig bis id Nacht ine warte 🫣 Mir hei auso zimlech Glück gha! Und s isch würklech sehr iidrücklech gsi zum luege – u mä het de glich geng z Gfüu, mä mües iz doch nomau es Föteli mache, eifach wüus so krass usgseht! Aber lueget säuber:

Irgendwenn heimers de doch no id Sauna gschafft, und ou öppis zässe hets no gäh.

Hüt simer nachem Zmorge wider mit dä Schi los. Wüus dr Schnee ufem See eher hert isch, simer eifach druflos gfahre, ohni Loipe – het ja keni. Isch aber rächt guet gange. Und di Ussicht! Sooo schön hie. Wüu hüt z Thermometer uf -28° isch klätteret, heimer nachere Stung wider kehrt, dr Pascal het sech müesse go ufwermä. Drum bini allei nomau um d Haubinsle gsuuset. Drbii isch sogar mis Handy iigfrore – ar Wermi isches de zum Glück wider gange. Mi Körper het sech offebar würk schnäu chönne aapasse, oder vilech bini o eifach Lappland-touglech uf d Wäut cho. 🤷🏼‍♂️😂

Am Nami heimer üsi Schiihose und Gamasche aagleit u si losgloffe i Richtig Hoger. Z Schiud am Dorfiigang warnt sogar vor „bitter chautem Wätter“. Bim ufeloufe heimer schnäu warm übercho – und einisch meh bini fasch überegheit, wüus sooo schön isch!!