Bärge, Meer u Ussicht 🌄

Nach üsem Sightseeing-Tag am Sunnti heimer am Mänti chli Ussicht wöue: Auso simer Schneechetteli für ad Schueh go choufe und ufe Storsteinen gloffe. Dä isch ou am Festland, dört womer scho am Tag vorhär häregloffe si. Für ufe chönnt mä ä Gondle näh – wüu üse MagicPass hie nid güutig isch (und mer hei wöue loufe;) ) heimer die usseglah. S isch zum Teil chli stotzig u rüschtig gsi, mir heis guet schnäu ufegschafft. Dobe heimer im übervoue Kafi es Plätzli gfunde und öppis gsnacked. Z Wätter isch de geng klarer worde, u so heimer üsi Ussicht de ou brcho.

U när wärs de wider drum gange abezloufe. Mi het scho bim ufeloufe dünkt, dass das doch besser müesst gah. Schlitte het mä leider keni chönne miete.. Aber: Di Clevere wüsse äbä, dases i Ghüderchüble uf öffentleche WC hüüfig ä Rolle Ghüderseck dinne het – und voilà, bini fündig worde im Café. Auso hani dört zwöi Seck la mitgah, für dasmer chöi aberütsche. Zum Teil simer de fasch chli schnäu ungerwägs gsi, uf jede Fau hets sehr gfägt 😁 und mir si ganz dunge aacho.

Nach däm Gspass isches de ou scho dunku worde. Znacht heimer imne Fusion-Restaurant gässe, mit luschtige Cocktails und emne Aquarium-Biudschirm ufem WC-Bode 😅

Geschter simer de ufne Fjord-Tour. Die isch soo schön gsi, i bi würk fasch überegheit! U zum Glück het sech de ou ändlech d Sunne no richtig zeigt. Dinne ufem Sitz hocke isch für mii fasch nid dinnegläge, o wes ufem Deck chli früsch isch gsi. Es het eifach aues so schön usgseh, und i hät mehreri Hüsli gseh, woni gärn würd iizieh (oder ömu Ferie mache).

Nachder Tour simer im Hafe id Sauna – ufemne Floss. Het auso chli gschouklet, drfür isch d Ussicht us der Saune toll gsi. Zum Glück dämmerets hie so lang, so heimer gäng no gueti Ussicht gha. Und ab und zue hurti iz chaute Meer go abchüehle (ömu ig).

Vor üsere Reis hani es Restaurant gfunde, wo ä Vegi 5-Gänger serviert. Das isch öppe jede Aabe usbuechet, drum heimer no vo deheimä us reserviert. U si de geschter Aabe zum Abschluss no dört go ässä.😋

ah ja, u Nordliechter heimer o gseh. Aber ir Stadt würke die eher weniger. Isch nid witer schlimm, wüu Tromsø ja nume dr Start isch gsi. Hüt morge heimer zimlech früeh ufmüesse, wüu üse Bös scho am 7i gfahre isch. Mit däm fahre mer iz öppe drü Stund bis uf Finnland, wäg vor Küschte und ine angeri Landschaft – nach verhäutnismässig légerä -8° erwartenis dört im Momänt dütlech cheuteri Temperature.