Tromsø 🇳🇴❄️

Mir si wider ungerwägs! Uf di Reis hani mi sit paar Wuche sehr gfröit – i ha scho lang mau im Winter i Norde wöue. U schliesslech hani mi ja no säuber für mini Bachelorarbeit müesse belohne, woni afangs Januar abgäh ha.😋

Geschter morge simer los. Zersch mitem zug uf Gänf. Am Flughafe het aues tiptop klappet, u zägg simer scho z Stockholm gsi. Dört heimer nach Plan 35 Minute gha zum umstige – u si nid sicher gsi, obs de längt. Schlussändlech hets de sogar sehr guet glängt. Ufem Flug uf Tromsø heimer im Sunneungergang g‘aperölet, und churz vorem Lande heimer sogar scho Nordliechter gseh. Auso ke Stress für aui, wo Sorge gei gha, dasmer wägem Wätter vilech sogar gar keni gseh.😁

Üses Gepäck u dr Schiisack si zum Glück ou heil aacho. Hurti mitem Bös id Stadt gfreeset und ab i üsi ungerkunft. sehr gmüetlech, aber nid ganz so warm. När simer ufne erschti Tour id Stadt und go Pizza ässä.

Natürlech isches chli chüehler hie aus ir Schwiz. Im Momänt so gfüuti -10°. Hüt heimer üs guet iipackt u si mau ufne erschte ougeschiin bi Tagesliecht. Mir gfauts sehr 😁 dr Pascal het no chli Müeh miter Temperatur.. Und d Wäge si mehrheitlech gfroore – trotz guete Schueh hets üs beidi scho mau tischet 🙆🏼‍♂️ und es isch definitiv houptsaison! Und haut no Sunnti hüt. D fuessgänger:innezone isch zimlech vou gsi. Mit chli sueche heimer aber es Tischli imne Kafi gfunde – dr FrenchPress-Kafi usder Wohnig het eim vo üs beidne (däm wo chli chaut het😁) nid glängt. Drzue ä riisige Zimetchnopf. När simer über d Brügg uf Tromsdalen gloffe. Ufder brügg hets zimli gluftet, im Vergliich zu angerne simer dört aber immerhin nid usgrütscht 😁

Ufder angere Site isch d iiskathedrale – vo usse ganz okei, ine simer de aber nid. Drfür simer no iz Polarmuseum, das isch zum Teil no ganz interessant gsi. Abde 1 hets scho chli chli aafah dämmere, und so gäg di vieri isches de würk scho dunku gsi. Isch no es speziells Gfüu, aber zum Glück simer vorhär ja viu dusse gsi. Iz simer zrügg i üsi Wohnig u wei de no go ässe – was nid ganz eifach isch, wüu sehr viu restaurants usbuechet si. Mau luege, obmer da no öppis finde 😁

Übrigens, für die wo üsi witeri Reis interessiert: wede unge ä Kommentar schribsch (s längt ou eifach ä Punkt oderso) chasch es chrüzli setzä, dassde es Mail brchunsch, weni öppis ufelade 🙂