Doch no schön

I mues zuegäh, bim zwöite Aalouf hetmi Rostock de doch no chli packt. Wahnsinnig lebändig het mi d Stadt zwar nid dünkt, aber si het mit dr Mischig us gotische und barocke geböide doch ä gwüsse Charme. Drum bini nomau chli dür d Stadt zofe u hamer di schönschte Geböide aagluegt. Woni du ändlech usegfunge ha, wi guet denä ihres Tramnetz isch, bini de o chli besser vorwärts cho. 😁 Gäge Aabe hets mi aber de doch nomau uf Warnemünde zoge, u das nid nume wüui mi Rucksack (u hoffentlech d Schueh, wo per DHL Express sötte cho si) ha müesse go hole. Zwar hets nomau meh gluftet aus di letschte zwöi Täg, aber immerhin het sech d Sunne no chli zeigt. U d Stimmig dert am Meer het mi definitiv meh packt aus d Stadt. I hätt no ewig chönne am Strand entlang loufä, uf z Meer loufä und i de Düne hocke und läse. U wüus soo schön isch gsi, hani o fasch nid gnue Föteli chönne mache. Pünktlech zur Dämmerig hani de leider müesse gah – mini Reis geit nämlech witer. Wi erwartet si d Schueh nid aacho – ke ahnig, wo die iz si. Uf z Päckli warte mani aber nid, wüu es tolls Ziu bevorsteit. Di Nacht fahri nämlech mit der Fähre uf Schwede. Nachem Check-In muesi angerhaub Stung warte, bis mi ä Bös de zur Fähre bringt – ä Fuesswäg giz nämlech nid, schliesslech hei di meischte angere Passagier*inne o es Fahrzüg drbi. I fröie mi aber sehr uf Schwede u hoffe, dasi chli zu Schlaf chume. Z Schiff söu nämlech scho am 5.40 z Trelleborg aacho.