Für au di Stägätritte woni geschter Morge im Lüchtturm zrügggleit ha, bini zwar scho obe uf der Plattform mitere tolle Ussicht übere Strand, über z Meer u z Hingerland belohnt worde. U glich het mi de dünkt, i heig iz sicher scho es Zmorge am Meer verdient. Schliesslech hani o müesse Energie tanke für mi Strandspaziergang. Mit Wind u glägentlechem Rägä isches auso würklech zimlech früsch gsi am Meer, Badeferiä ar Oschtsee muesme (wenn überhoupt) äuä im Summer mache. 😁 Aber ja, i bi säubschtverschtändlech glich go badä, das hani mer de doch nid la näh. U nachemne ändlose Sprint übere Strand mit zwo Hechtroue, wüumer es Plastigseckli drvogfloge isch, hani so warm gha, dases ke Überwindig me brucht het, mi id Wäue z stürze. Am Strand hani de ou no mitem Hotel z Hamburg telefoniert, zum irgendwie iirichte, dass si mini vergässene Schueh no ufd Poscht chöi tue, dass si mit Expressversand hüt aachunnt, bevor i witerreisä.. simer gspannt ob das klappt.
Am Nami bini när ändlech uf Rostock – ä härzigi Stadt, wo nid so starch ungerem Chrieg glitte het wi angeri, u drum iz no viu auti Hüser het. Das isches de für mi aber ou scho gsi – dr Charme vor Stadt het mi (no)nid packt. Drum gani iz nomau go luege, obs nid doch besser wird 😁
Übrigens: Wede der Titu vo däm Blogiitrag nid ganz versteisch – Pfingerabderröschti vo Patänt Ochsner!
