Meer!

Yes, nachdäm i mitemne übervoue Zug Rostock erreicht ha us de no witer i mis Hostel z Warnemünde (Stadtteil vo Rostock ar Oschtsee) gschafft ha, hani ändlech z Meer gseh – vou im Schiff. Leider hani di wasserdichte Schueh z Hamburg glah, u der chlii Rucksack isch trotz nöier Imprägnierig ou nid dicht gsi. Drfür isches rächt schön da – u mit der Rägejagge hani immerhin der Dresscode füre Lüchtturm troffe! Ufe Strandspaziergang hani du für hüt verzichtet, aber go luege hani glich müesse. Wi erwartet isch dä natürlech vouer Strandchörb, wobii die luschtigerwiis aui vom Wasser wägluege. I finge sicher no use würum. Z Stedtli vo Warnemünde isch in etwa genau so, wini mer dä „Kurort“ vorgsteut ha. Hotels, Feriewohnige, viu Chleiderläde und Fischständ. D Hüsli würke chli wine Mischig zwüsche Ferieresidänze am Bielersee und amerikanische Vorstadtquartier. Säubschtverständlech aui üüüüsserscht gschmackvou dekoriert. Di nächschte zwöi Nächt verbringi imne Container – natürlech schön usboue zumne Hostelzimmer. Gseht rächt kuul us, dummerwiis hani vergässe es Föteli z mache. Jä nu, morn de.

D Farb vom Lüchtturm hani würk nid schlächt breicht.