Adaptermarathon, Mate und Rägä

Nach emne sunnige Nami ir Hafecity und ere erfouglose iichoufstour quer dür Stadt ufder Suechi nachemne Adapter (hät mer ja o öpper chönne sägä, dasi mis Kabu mit drü Stöpsle z Dütschland niene cha iistecke 🤣) hanimer de am Aabe doch no das Miniatur Wunderland müesse go aaluege. Viu z viu Lüt, u de doch immer chli z gliche – nachere aasträngende Stung hanimer de es Bier ir Spicherstadt gönnt.

Hüt morge hani übrigens ändlech ä Adapter gfunge! Iz bini ufem Wäg i (Nord-)Oschte. D Fahrt füehrt dür rächt ödi Landschafte – es gseht so zimlech überau glich us. Kahli Fäuder, paar Böim und im Rägä no grauer würkendi Ortschafte mit je nachdem zimlech schittere Bahnhöf, währenddäm i mim Ziu e Schritt necher chume, mi einisch dür z dütsche Mate-Sortimänt z trinke. Club-Mate isch ar Spitze definitiv scho abglöst worde 😁