Floris het auso scho einigi Schäde hingerlah – hei sogar Föteli vo kippete Camper gseh 🫣 Und viu blockierti Strasse. Vo däm här simer ächt froh gsi, heimers no uf Fort William gschafft u dört dinne chönne usharre. Wobi ou dört ä Teil vor Stadt isch gsperrt gsi wägem Sturm. Mir wüsse nid gnau würum, aber d Füürwehr isch ömu lang da gsi. Am nächschte Tag simer i Richtig Oban ufbroche u dört spontan uf d Fähre für d Isle of Mull. Di sig weniger überloffe aus d Isle of Skye, aber sehr schön. Mitem Bös simer ufder Insle (wo rächt gross isch!) bis uf Tobermory gfahre – es chlises Hafestedtli mit farbige Hüser. No härzig, aber mir hei ganz ad Küschte wöue zum schlafe. Auso simer druflos gloffe, u hei leider schnäu gmerkt, dases ufder Insle no schwirig cha wärde, e Schlafplatz z finge, wüu über iizuneti Schafherdä si gsi. U dört sött mä nid Zäutle. Per Zuefau heimer ä Büürin troffe, u di hetnis grad aabote, dasmer uf ihrem Land ufder Klippe chöi schlafe. Das heimer natürlech aagnoh. Ade Ross und Schaf verbi, und scho simer amne tolle Plätzli zum Übernachte aacho. Mit genialer Ussicht uf z Meer!
Am nächschte Morge simer witerzoge und ufe Bös für ine angere Egge vor Insle z cho. Dört simer lang ar Küschte entlang gwanderet, hei viu Tier und schöni Stränd gseh. I derä Region hets zwar o viu Schaf gha, aber dütlech weniger. U so heimer (oder ömu ig) scho fasch Müeh gha z entscheide, a welem vo au dene schöne Plätz mer wei zäutle. Wüus ändlech mau ke Qualle gha het, bini sogar iz Meer! Chaut isches aber immerno gsi. Nachem Zäut ufboue heimer kochet und dr sunnig Aabe gnosse.
Leider hets de ir Nacht afah lufte u rägne. Wägde starche Winböe heimer nid chönne schlafe – einersits wüus lut isch gsi, aber o wüumer chli Angscht um z Zäut hei gha. Das sött zwar Böe bis 70km/h ushaute, aber mä weiss ja nie.. So heimer de uf di haubi zwöi ir Nacht bi Wind u Räge üses Zäut paar Meter züglet, was erstuunlech guet klappet het. U so heimer doch no chli Schlaf übercho. Und s het auso aues ghäbt und isch troche blibe! Am Morge simer früeh uf, wüumer ufe Bös hei müesse. Es letschts Bialetti-Kafi am Meer, u de simer losgloffe. Bös uf Tobermory, Bös a Fährhafe, Fähre uf Oban, u dört ufe Zug i Richtig Glasgow. Leider müesse mer üs iz nämlech ufe Heiwäg mache – am Samschti fahrt üse Zug vo London. Wüus mitem Zug doch ä rächti Strecki isch, teile mers üs chli uf. So heimer iz hüt no ä Aabe z Glasgow und morn nomau ä Nami & Aabe z London 😊
