Canna & Sturm!

Vo Mallaig us simer miter Fähre öppe 3 Stund bis uf Canna gfahre. Das isch di chlinschti vode „Small Islands“, wohne düe dört nume 18 Lüt. Es het gloub insgesamt zwöi oder drü Guesthouses. S si auso nid soo viu Lüt dört. Mir hei üses Zäut „ufem Campingplatz“ ufgsteut – es het WC, ä Duschi und ä Ungerstand zum choche, aues i eifache Houzüttli. Z Zäut chame ufsteue wome wott, s isch auso fasch wi Wiudcampe 😁 Mir hei üses Zäut ufem Hoger obe ufgsteut – einersits füre Usblick, aber ou wägde Mugge.

D Insle het üs mega guet gfaue. Strand, Klippe, viu grüen, z Meer… Aber lueget säuber ufde Föteli!

Vorgeschter heimer ä Wanderig zumne Feuse im Meer gmacht. Wüu: Dört nischte bis aafang ouguscht Papageietoucherli!! Auso simer no grad rächtzytig gsi. Di hani natürlech müesse gseh. Heimer zum Glück ou 😍 Fötele isch nid so guet gange, aber mir hei lang beobachtet u würk viu gseh. So wies usgseh het, flüge si würk jede Momänt wider zrügg.

Nachde Puffins simer no a Strand. Dä isch ou sehr schön, z Wasser isch aber ächt chaut. Und was leider würklech vom bade abhautet: Es het sehr viu und rächt grossi Qualle überau 🥲

Und nach däm isches losgange mit Räge – zwar nid viu Wasser, aber zäme mitem Luft glich chli schwirig. Wüu no meh Wind gmäudet isch gsi, heimer üses Zäut när paar Meter verschobe. Inne isches aber troche blibe! Und am Nami heimer zum Glück no im Cafe Canna aaglüte – z einzige Restaurant hie, wo schiins wit use bekannt sig. Es het nume 6 Tische, aber mir hei tatsächlech uf di 8i no chönne reserviere. Und das het sech i jedere Hinsicht glohnt: Mir hei nid im Räge müesse choche und hei im trochne chönne ässe. Und z Ässä isch sehr sehr fein gsi!😍 Würklech es Highlight gsi. Nid nume z Cafe, sondern d Insle insgesamt.

Mir hätte vilech no ä Nacht verlengetet – aber da chunnt iz äbä z aber. Füre Mänti (auso hüt) hetsech ä Sturm aakündiget. Währenddäm heimer 1. nid im Zäut wöue si, u 2. isch z erwarte gsi, dass d Fähre de usfaue. Auso simer zrügg uf Mallaig u mitem Zug no chli witer am Meer bis Arisaig. Dört heimer imne härzige Hotel Znacht gässe u pfuuset. Und de isch immer wi meh klar worde, was üs erwartet: storm Floris! Wüu Wind-Rekorde für die Jahreszyt erwartet wärde (bis 130km/h), het Scotrail scho geschter d Züg ab 12.00 aui cancelled. Schlussändlech isch de gar kene gfahre. Mir heis aber no mitemne Bös uf Fort William gschafft, wüu z Arisaig ke Zimmer me frei si gsi. Hie simer aber gstrandet. Zum Glück heimer no eis vode letschte Hotelzimmer chönne ergattere, u iz simer sitem Mittag hie am usharre. Dusse duets rächt, u es sige viu Böim uf Strasse u Schine gheit, Brügge gsperrt und so witer. Morn söugs aber wider guet si. Mau luege, ob und wie mer de witerchöme 😁