Vom (nidmau) Niederhorn bis ad Küschte

u zägg simer ar Westküste!😍 Aber fömer dört ah, womer ufghört hei.

z Fort William simer ar Küschte entlang gloffe. Mir si zwar nonid ganz am offne Meer gsi, s het aber ou Gezite gha – so heimer sogar ä Spaziergang ufem Meeresbode chönne mache, wüu grad Ebbe isch gsi. Speter simer richtig gueti Pizza go ässe, u s het sogar hie obe vegi Salami gäh für druf!

Nachemne feine Zmorge i üsem Guesthouse simer churz mitem Bös iz Tal hingere gfahre u vo dört zimlech stotzig 600 Höhemeter ufegsecklet – so fescht hani gloub no nie gschwitzt. S isch zum Teil würk fasch gredi ufe gange 🫣😂 U üsi Ruckseck si doch eher schwär. Aber: Mir heis gschafft! Uf hauber Höchi vom Ben Nevis (zu däm speter meh) hets ä schöne See – dört heimer wöue zäutle. Ä nid komplett nasse Platz z finge, isch eher schwirig gsi.. Aber o das heimer gschafft. Und so heimer ä tolle Aabe am See gha, üses Znacht kochet u tiptop pfuuset ide Bärge. Isch früsch gsi, drfür simer wit u breit di einzige gsi!

Am nächschte Morge simer früeh uf, für ufe Ben Nevis z secklä. Das isch dr höchscht Bärg vo Grossbritannie – mit 1345 m.ü.M 😂 Auso nur es bitzli höcher aus Beatebärg! Drfür startet mä bi 0m. Isch sehr ä beliebti Route. Bis öppe am 22.30 si no Lüt abecho. Und am 2 ir Nacht hani schowider Lüt gseh, wo miter Taschelampe ufe si. Mir si de am 9i los, u heis öppe uf di 11i ufegschafft. Zwüschdüre isch dr Näbu immer wider furt, u mir hei viu gseh. Ufem Gipfu leider nid.. Drfür heimer üse Gaschocher und d Bialetti ufetreit, und hie ufem Gipfu chönne Kafi trinke. När simer wider abe (s het sehr viu Lüt gha, wonis entgäge si cho), hei üses Zäut abboue, und si wider bis iz Tal abe. Dört ufe Bös, nomau go iichoufe, u när ab ufe Zug. D West Highland Line giutet aus schönschti Zugfahrt hie obe – isch härzig gsi, aber weme scho ide Bärge isch gsi, isches ou nüm soooo speziell. Mir si ou no über das berüehmte Viadukt gfahre, wo nach üs doch eher überbewärtet isch..

Z Morar simer usgstige und am See entlang gloffe, bismer ä schöne Platz gfunge hei. Und was für eine! Dört heimer de kochet, üs im See gwäsche (dä isch ächt chaut!) und när dr Aabe gnosse. A derä Steu nomau ä Aamerkig zude Mugge: Di chöme hie würk in Schwärm am Aabe und Morge. Aber: Wes meh aus 6km/h Wind het, chöi si nid flüge. Drum simer geng froh umnes Lüftli – und sueche üs dämentsprächend ou exponierti Schlafplätz. D Stiche si zwar nid so schlimm wi bi angerne Mugge, aber si biisse doch chli.

am Morge heimer usgschlafe, u si nachem Zmorge los. Mir hei nämlech ä Fähre wöue verwütsche! Wüu dr Wanderwäg eher tricky isch gsi, isch das doch no ä Useforderig gsi. Mir heis aber pünktlech iz Dorf am Meer gschafft – u si chli überrascht gsi, dass dört ussert drü aute Hüser gar nüt isch gsi. D Fähre (wo sech aus chliises Böötli usegsteut het) isch aber tatsächlech cho – abghout hei si üs mitemne chliine Motorboot, wüusi wägder Ebbe nid zum Stäg hei chönne fahre. Ufder Fahrt heimer viu Delfine und ä Seehung gseh, bevor mer z Mallaig si aacho. Isch ächt es schöns Erläbnis gsi. Und da wäre mer iz wider am Aafang vo däm Biitrag: Ar Westküste!

Mallaig isch es chliises Dörfli, hie isch d Ändstation vom Zug, womer vorgeschter gnoh hei. Mir hei es Hotelzimmer buechet, und hei üs so widermau richtig chönne putze. Und sogar ä Wöscherei heimer gfunde: Vor der Tür heimer üs no komplett umzoge, für dassmer würk aues Wanderzüg chöi la wäsche. Het ömu ä Chübu vou gäh. u hüt morge isch si scho parat gsi zum abhole. 😊

När heimer no Znacht gässe und üsi Witerreis plaanet. Da hetsech nones Problem zwigt: Mir hei nüm soo viu Gas gha zum choche. Wüus hie nid würk Läde het, heimer scho chli Stress brcho. Ar Tanksteu hei si üs aber zum Glück chönne witerhäufe, so simer iz wider beschtens usgrüschtet. Mir hei entschide dasmer none Nacht hie z Mallaig blibe (d Ungerkunft müesse mer wächsle, aber s si nume öppe 30 Meter), morn fahre mer de mit der Fähre witer.