ab id Bärge

So, wi aakündiget heimer üs es erschts mau mitem Zäut id Natur getrout. Vo Edinburgh us simer mitem Zug 3 Stung bis Aviemore gfahre, u vo dört mitem Bös i Cairngorms Nationalpark. Zersch simer lang düre Waud gloffe, nach öppe 2.5 stung ischer de ändlech fertig gsi. U d Ussicht isch grandios worde. Mir si nomau öppe zwo Stung gloffe, bevor mer üs de uf d Suechi nachemne Schlafplatz gmacht hei. Mir hei zwar ä Wasserfiuter drbi, hei aber zur Sicherheit glich no ä richtige Fluss gsuecht – dä heimer zum Glück ou gfunge. U ganz ir Nechi heimer de üses Zäut ufboue. Wüu scho spät isch gsi heimer de aus erschts grad mau kochet – couscous mit tofu und emne päckli gmüessuppe (auso drigmischt, nid separat), für dases no chli öppis gsungs dinne het 😉 Dr tüürer, gfrüür-trochnet food usem Outdoor-Shop spare mer üs no uf. Bim Ässä het de leider dr Wind abgsteut, u subito si gaaanz viu chlini Midges umegsurret – di stäche zwar nid würklech, si aber närvig! I ha mau mis Netzli usteschtet, aber dasch nid würklech gäbig. Sobauds de wider chli gluftet het, si si wider wäg gange. U so si mer de när ou glii mau iz Zäut go lige. Dr Platz dört inne längt grad für zwöi Lüt ohni Rucksack. Weme mau ligt und aues sortiert het, ischs aber no ganz komfortabu 😊

Am Morge hets chli grägnet u isch düre Luft o chaut gsi, drum heimer im Zäut Zmorge gässe. När simer chli unschlüssig gsi – mir hätte no ä Tour über zwöi Bärge plaanet gha, u dört zwüschinne wöue übernachte. Wüus aber Gwitter gmäudet het (s git z Schottland äxtra mountain forecast, dä isch ächt super) heimer entschide gschider wider dinne z schlafe. Mir si de glich no hurti ufne hoger gsecklet, u när zrügg zur nächschte Böshautsteu gwanderet. Vo dört simer mitem Bös wider uf Aviemore u dert i Zug für uf Inverness, womer no es Hotel gfunde hei (spontan öppis zahlbars z finde isch ie Houptsaison natürlech nid ganz eifach..).

Hüt heimer lang pfuuset und üs vo dere schlussändlech glich seehr länge und asträngende Wanderig erhout. När simer mitem Bös uf Fort William, hie heimer es Zimmer imme sehr härzige Guesthouse diräkt am Wasser. Morn weimer de wider id Bärge 😊