Nach London isch Edinburgh aso zimlech überschoubar. Mir hei beidi mitere grössere Stadt grächnet! Umso meh gniesse mer di schöni Autstadt. Übernachte düemer imne Hostel zmitts im Chueche – imne ehemalige Gfängnis. Mir schlafe im Grichtssaal und hei dört je ä Pod, auso quasi es Tablar imne Gsteu, mit Vorhang. Ir Nacht nid gaanz so ruhig wienes 2er-Zimmer (s het immerhin 28 so Pods im Ruum), aber doch ganz komfortabel. Und äbä: Diräkt ar Royal Mile. Hie hets vorauem Pubs und Läde – und sehr viu Strasseshows (es paar no iidrücklech, hüüfig aber eher chli unagnähm 😅).
z Schloss heimer leider nid chönne bsueche, wüu d Tickets aube rächt im Voruus usverchouft si. Geschter simer ufe Husbärg vo Edinburgh – ä churzi Wanderig, für üsi nöie Schueh no chli iizloufe für d Highlands 😁. Hüt simer no es paar auti Sehenswürdigkeite go aaluege und hei üsi Camping-Usrüschtig ergänzt. Iz simer ready für d Highlands! Morn starte mer im Cairngorms-Nationalpark. Dä isch no eher im Oschte, und söug ä guete iistig id Highlands si. Mir fröienis ömu, ändlech chli id Natur chönne z gah. Leider hani mer usgrächnet iz widermau ä liechti Ohreentzündig iigfange, aber das chunnt de öppe glii wider guet.
