London #2

Geschter heimer London witer erkundet – unger angerem d Tower Bridge. Di heisi grad ufeklappet wägemne Schiff, was natürlech aui hei müesse feschthaute 📱. Am Nami simer i Skygarden – ä Indoor-Garte z oberscht imne höche Geböide (36. Stock). Dert chiem mä gratis ine, weme öppe drü Wuche vorhär es Ticket hätt buechet.. Mir hei aber usegfunde, dasme mitere Restaurant-Reservation ou so inechunnt. ersch rächt no ohni aazstah! So heimer es Zmittag mit Ussicht über London gha. Dr Garte auerdings.. jaja, da heinis ou scho Sache meh überzügt. Aber d Ussicht isch scho krass gsi.

Krass findi ou, wiviu di meischte Attraktione choschte. Da bisch eigentlech bi dä auerimeischte Sache so ab 25-40 Pfund drbi – egau ob London Eye, irgend ä Turm oder id Burg. Drzue darf mä aube no aastah und es isch eh übervoll. Mir hei üses Gäud lieber für feins Ässä usgäh. Am Aabe simer in Chinatown go ässä und hei ire Bar z Soho no EM gluegt. U drbii es euters Ehepaar vo Schottland lehre kennä. Di hei üs iiglade, sä z Schottland z bsueche – i die Region wo si wohne heimer bis iz nid plaanet z gah, aber who knows, wo‘s ps de häretribt. Isch ömu schön, wi kontakfreudig viu Lüt hie si 😊

Iz simer im Zug uf Edinburgh. Z Vegi-Breakfast giz sogar aus TakeAway am Bahnhof! und usem Zug hetmä super ussicht.