reise, schuene und ässä

Hüt morge früeh simer gstartet – nach 4 Täg Gurte eher müed. Mir hei aber nid würk ä Wahl gha: D Züg vo Paris uf London hei sehr weni Plätz für Interrail. Drum simer froh gsi, heimer überhoupt no chönne bueche. Wasmer ersch ungerwägs usegfunde hei: Für d Strecki Strasbourg-Paris heimer zwar z Ticket und ä Sitzplatzreservation gha, aber nid dr nötig Interrail-Zueschlag zaut 🫣 Und das hetmä o nüm chönne löse. Ig natürlech scho Stress gha – zum Glück isch aber niemer cho kontrolliere! Füre Eurostar düre Tunnu mues mä lang aastah, d Kontroue si wi am Flughafe. Het aber aues tiptop klappet, u mir si uf London düüset!

Hie simer am Nami chli umegschuenet – aber nachem Buckingham Palascht, Telefonzäue (wo gar nüm brucht wärde) und Big Ben hets üs de ou scho glängt mitem Touri-Rundgang. Dr Stadtteil Soho het mer de dütlech besser gfaue, viu gmüetlecher u ganz ohni Mönschemasse vor irgendwelchä Monumänt. Füre Rückwäg heimer sone Bös gnoh, u tatsächlech z Plätzli ar Schibe verwütscht. Scho no iidrücklech so dür d Stadt z fahre! Z Pimlico, wo mir wohne, simer de no ines Pub u hei dört scho quasi ä nöii Fründschaft gschlosse. Und zum Znacht hani tatsächlech vegans Fish & Chips gfunde 😍 Hüt morge es English breakfast (ou das giz zu mire fröid in vegi), und iz loufe mer chli am dräckige Fluss entlang und sueche di schöne Brügge drüber.