…uund fertig

Üsi letschte Täg heimer ou no mau am Meer verbracht – di Sunneungergäng ar Weschtküschte heinis eigentlech o nid würk ä angeri Wau gla. Am Zischti isches chli schwirig gsi, ä guete Platz z finde. Mir hei diversi Orte aagstüüret, s het aber niene Platz gha. Zum Schluss simer de ufne Camping, wüumer nüm hei möge sueche. Immerhin ischer schön am Meer gläge gsi, u so heimers üs de nid la näh, es witers mau am Strand z choche und z ässe. Näbscht em Meer, dr Sunne u diverse angere Sache wirdi di grossi Uswau a Vegi-Würschtli ir Schwiz sehr vermisse. Z Schwedä giz würk a jedere Tanksteu und überau brätleti Würschtli z choufä. Dört zwar säute Vegi, drfür giz ide Läde diversi Variante. U di si dür z Band aui geniau! Dir chöitnech dänke, mit was dr chlii Chüuschrank im Bös uf üsere Rückreis vougstopft isch.. 😉

Geschter simer de witer südlech gfahre, i richtig hei. Wüumer dr letscht Tag nomau hei wöue gniesse ohni Stress, heimer nomau ä Camping buechet. Womer dört am Mittag si aacho, simer go jogge. U da simer a Hafe vo Barsebäck cho – u hei dört Steuplätz gseh. U was söui säge – mir si zrügg gsecklet u hei no Schlafplatz gwächslet. Het sech meh aus nume glohnt! Säubschtverständlech simer o dört go bade u hei dr Sunneungergang im Hafe bewunderet.

Hüt morge heimer de aues zämepackt u si losgfreeset. Zersch übere Öresund uf Dänemark u dört uf d Fähre. Dört heimer sogar no Glück gha u hei aus letschts no grad uf d Fähre dörfe fahre, ohni müesse z warte. So simer scho churz nachem Mittag z Dütschland aacho. Um Hamburg ume hets zimlech gstouet, aber z Navi het üs suber drum ume glänkt. U so simer witer zügig vorwärts cho – u wos öppe am 5i aazeigt het, dasmer „nume“ no 7h Fahrt vor üs hei, heimer üs langsam aber sicher druf iigsteut, grad i einisch heizfahre u nid no nöime ä churze Übernachtigsstop iizboue. Mit gnue Kafi und regumässigem Wächsu am Stürrad simer iz scho glii z Basu. D Fahrt dür Dütschland isch immer wider chli närveufribend, wüu si zum Teil so schnäu fahre hie. Aber bis iz het aues guet klappet, u mitemne letschte Espresso füehle mer üs gnue fit, no 1.5h bis hei z fahre. So heimer morn düre Tag no gnue Zyt zum usruume – und ig wider zum packe, am Samschti geiz nämlech grad witer iz Pfadilager.

Mit däm isch die Blogphase ou wider düre – bis zum nächschte Trip!😁