Di letschtä zwöi Nächt heimer am Hafe chli usserhaub vo Lysekil verbracht. Dört hets rächt viu Steuplätz gha, u zu üsem Glück isch no grad eine diräkt am Meer frei gsi!😍 Richtig tolle Platz. Geschter düre Tag u vorauem hüt, womer säuber wäggfahre si heimer wesch richtig chegget, WI glück mer hei gha. Di angere Camper warte vor d iifahrt, u chum isch öpper am Meer furt, wird dr Platz i beschlag gnoh. Hüt isch ä Schwedin scho cho härestah, bevor mir si abgfahre, u het dr Platz bsetzt.
Nachere Erkundigstour uf Lysekil und emne Snack im Hafe simer zrügg und hei kochet – äändlech mau Kötbullar. Het duuret, bismer die in Vegi gfunge hei. Chli komisch – 2021 hets das fasch überau gha.. Uf jede Fau heimer im Sunneungergang üses Znacht diräkt am Meer gnosse.
Geschter simer ufne Kajaktour dür d Schäre. Mir heinis rächt wit usegwagt, drum hets zum Teil de doch chli gwäuet. Drfür heimer diversi chliini Inseli chönne aastüre zum pöisele. Het richtig gfägt di Tour!!
Am Aabe simer wider uf Lysekil gloffe und si dört zum erschte mau i dene Ferie uswärts go ässe. Mir hei üs für d Beiz am Hafe entschide, was gloub nachem Steuplatz und dr Kajaktour es dritts Highlight isch gsi! Nachemne tolle Ässe simer de ar Küschte entlang hei gloffe u hei einisch meh ä geniale Sunneungergang verwütscht.
Interessant,churzwilig wie du Euro aFerietage beschribsch.danke vielmal,dass ich auch ein bisschen daran teilhaben darf.Alles Gute und viele liebe Grüsse Grosi