Schowider chli z Italie

Okei, iz chani dä Satz gloub de Standardmässig iifüege, z Wifi hie verarscht mi immer wider. Dä Iitrag isch vo vor zwöi Täg 😅

I ha ä witere Lieblingsort z Nepal gfunge! Guet, bis iz hetmer ja fasch aues mega gfaue.. Bandipur isch aber definitiv wider es Highlight. Dr erscht Vorteil: es het nid so viu Touris, wüus keni diräkte Verbindige git da ufe. Mä mues dr Tourist bus näh und imne chline Dörfli am „Highway“ usstige. Vo dert chame für 1500 Rupie es Taxi näh, das ischmer aber chli z tüür gsi. Drum hani wider dr local bus gnoh, mit däm geiz nume minim lenger u choschtet 50 Rupie 😁

Z Dörfli erinneret mi würklech chli a Italie. Im Zäntrum hets ä Strass, wo uf beidne Site vo aute Newari-Hüser flankiert wird. Und dr Dorfchärn isch Fuessgängerzone, ä rächti Säuteheit z Nepal! Dämentsprächend hets viu Beizä u Kafis, u d Lüt hocke gärn dusse. Usserdäm het mä ä grandiosi Ussicht.

Wüumer z Dörfli so gfaut, ungernimi gar nid viu, sondern loufe am liebschte eifach dür d Strasse, due chli lädele und natürlech d Gaschtronomie tatchräftig ungerstütze. Vorgeschter hani fasch dr ganz Tag mit mim Buech i Kafis verbracht, zwüschine hani aube nume Location gwächslet (Kafi, Zmittag, Tee, Zvierisnack, Tee, Znacht,..). Am spetere Nami bini no ufne Hügu näbem Dorf gloffe, vo dert gseht me schiins ä super Sunneungergang. Stimmt zwar, u mä gseht i aui richtige zimlech wit, aber i ha schowider chli Päch mitem Wätter gha. Am Horizont hei sech d Wuuche aber de chli ufglockeret u so isches doch no sehr schön gsi zum luehe. Spontan hani de no entschide ä witeri Nacht dert z blibe. Hüt bini wider zrügg uf Pokhara gfahre u ha mini Fründ*inne wider troffe ☺️