Im Dschungu

Widermau Wifi-Problem gha. Steu der eifach vor es wär geschter aabe:

Di letschte Täg hani im und näbem Dschungu verbracht. Dr Ort hie isch bis geschter zimlech vougstopft gsi, äbä wäg denä Wahle. Mitlerwile hani aber no in Erfahrig bracht, dases „nume“ parteiinterni Wahle si. Di kommunistischi Partei het quasi z ganze Dorf in Beschlag gnoh u, näbscht dä offizielle Veraastautige, vorauem gässe, trunke u gfeschtet 😀 Sit geschter isches fasch chli läär 😂

Dr erscht Tag isch zimlech stressig gsi. Am Morge simer mitemne Kanu düre Fluss gfahre u hei drbii viu Krokodiu u Vögu gseh. Und ufder Wanderig düre Dschungu heimer es Rhinozeros troffe, u es isch zimlech nach cho. Am Nami bini de uf Safari mitem Jeep. Dert heimer vorauem Antilope, Affe, schöni Vögu u no meh Rhinozerösser (?) gseh. Und am Aabe simer ä Tharu-Tanzshow go luege. Geschter morge bini ufnä bird watching tour, und am Nami bini wider i Dschungu gfahre u ha dert übernachtet. Am Aabe simer lang uf der Terrasse ghocket u hei ufene Tiger gwartet – leider kenä gseh 😥 Zum Schluss bini hüt no ufnä Velotour dür d Gägend.

Wüu mis Hotel mittlerwile läär isch, hani sogar no es Zimmerupdate brcho 😀 Morn reisi witer uf Bandipur. Das isch zwar nid so wit wäg vo hie, isch aber de schowider höcher obe. U när gniessi no mini letschte zwo Wuche vor Reis. I ha nämlech geschter mi Rückflug buechet 😥