Wider ungerwägs

I has auso gschafft, mitem local bus uf Sarangkot ufezfahre. Leider isch z Wätter am nächschte Morge nid so guet gsi, drum hani dr Sunneufgang (schowider!?!) nid gseh. Zrügg uf Pokhara bini de gwanderet. Nach däm Usflügli hani none Tag z Pokhara verbracht – u wär o gärn no lenger blibe. Aber Nepal het äbä no meh z biete aus das woni bis iz erläbt ha: Drum bini iz ufe Wäg i Süde vom Land, zum Chitwan-Nationaupark. Mitem tourist bus sötts eigentlech 5 Stung gah, mittlerwile simer aber scho meh aus 7 ungerwägs, wüu so viu angeri Bösse; Outos u Töffe uf dr Strass si und öppe au 200m für 500m Bouschteu isch 😂 Mau luege obmer ds hüt no schaffe. I wär ömu dankbar, wüu mi Sitznachbar sech no weniger guet cha stiuhaa aus ig unds zimlech heiss isch i däm Bös.

Nachem Himalaya und dä höcher glägnige Stedt bini iz gspannt ufä eher tropisch Süde. Heisser, füechter, meh Schlange, Rhinos, Tigere und Elefante – und Mugge. Di hani ja scho grundsätzlech nid so gärn, hie chöi si uf aus ufe no paar chrankheite wi Malaria übertrage. Aber i bi guet usgrüschtet zum mi verteidigä 🤓

Nachtrag: Mittlerwile bini z Sauraha aacho, das isch es Dorf diräkt näbem Chitwan-Nationalpark. Us Gwohnheit hani kes Hotel buechet gha, wüume hie rächt guet eifach chli cha umeloufe, paar Hotels abchecke u verhandle – normalerwiis (u wüus momentan nid so viu Touris het). Woni aber hie bi aacho hani erfahre dass grad Wahle (und Wauveraastautige) si und drum aui Lüt i ihri Heimat fahre und dämentsprächend aui Hotels hie usbuechet si! Mit viu Glück hani iz aber sogar es Zimmer diräkt näbem Park gfunge. Hie blibi iz vier Nächt u ha scho grad paar Sache buechet – unger angerem ou ä Übernachtig im Dschungu 🙈 Da bini ja gspannt. Morn morge geiz iz de zersch mau ufne Kanutour, und am Nami de es erschts mau i Dschungu. Chli schad dünkt mi, dass si hie unger angerem o Elefanterite uso aabietä. Dr Hotelbsitzer het sech vor paar Jahr entschidä, settigi Aktivitäte nüm aazbiete – und är hetmer verzeut, dass si dranne si, das ändlech komplett abzschaffe.