fasch chli deheimä

Mir heis mega guet i üsem Grüppeli, drum heimer eigentlech sitmer üs troffe hei di ganzi zyt zäme verbracht. Am Samschti simer sogar zämä zum Lake Begnas gfahre, si dert chli go böötle u hei d Nacht imne Hotel ufem Bärg verbracht – mit der Idee, de dr Sunneufgang z luege. Leider isches am früeche Morge näblig gsi, drum heimer nüt gseh. Gfägt hets glich, u d Ussicht heimer speter ou no brcho 😁

Näbscht däm heimer vorgeschter zwöi Höhline aagluegt. Beidi rächt chlii u nid mega iidrücklech an sich. Ir „bat cave“ isch aber di ganzi Dili vou Flädermüs gsi 😁

Wüu sech di angere drü z Pokhara guet uskennä, wüsse si o wome z guete Ässä brchunnt. So hani es paar kulinarisch hochstehendi Täg hingermer 😁 O süsch hani zimlech viu vo ihne chönne lehrä, aus locals (u d Französin wo scho lang da isch u es Jahr z Indie gläbt het) wüsse u kenne si natürlech viu. Nid z letscht dank däm füehli mi z Pokhara mittlerwile fasch chli deheimä 😀 Drum hani geschter no mis Visum chli verlengeret. Glichzytig hani aber o feschtgschteut, dasmer nüm so viu Zyt blibt uf mire Reis 😥

Di angere göh hüt ufnes churzes Trekking, das hani aber nid nomau wöue. Drum fahri ufene Bärg näb Pokhara, vo dert söug me dr bescht Sunneufgang vom Land gseh.. Mau luege. 😀 Und i probiere mitem local bus ufezfahre – das isch es erläbnis für sich. allei hani mi das no nie gwagt, aber hüt probieris mau.