Pokhara

Für di 200km vo Kathmandu uf Pokhara het dr Bös öppe 8h brucht 😁 Isch aber wider ä luschtigi Fahrt gsi. Pokhara isch rächt ä angeri Stadt aus Kathmandu. Es het breiti Strasse mit zwo Spuure, Trottoirs, weniger Verchehr, ä Seepromenade, viu Bars & Restaurants, u es isch generell weniger hektisch, lut u dräckig aus Kathmandu. Wäg däm und wägem vo Bärge umgäbne See redä d Nepali gärn vo „Second Switzerland“ 😁

Ufemne Hoger am See steit eini vo gloub 71 World Peace Pagodas – buddhistischi Tämple, wo nachem 2. Wäutchrieg si boue worde. Z Ziu si 100 so Tämple uf dr ganze Wäut. Zu derä hie hani wöue ufewandere, dasch aber schwiriger gsi aus dänkt. Di meischte Lüt fahre mitemne Ruederböötli übere See und loufe churz ufe – i ha chli wöue spare und aues loufe. Dummerwiis het dä See sone Uslöifer wo eifach nid ändet u ke Brügg oder öppis het, drum het di Wanderig trotz churzer Luftlinie eher lang duuret. Drfür hetme vor Stupa us grandiosi Ussicht, ohni Wuuche wärs sogar no besser gsi 😀 U für zrügg hani de doch o de chürzer Wäg gnoh und mi übere See la ruedere.

Am See hani ä Französin und ä Nepali lehre kennä, u mit ihne hani di letschtä Täg paar Sache ungernoh. Geschter aabe simer imne mega tolle Restaurant am See go ässä. Es isch chli im Waud am Seeufer u d Tische si aui irgendnöime im Gländ verteilt, mit Chüssi und Sitzseck und Liechterchettine. Isch würklech sehr schön gsi ☺️