..uund gschafft!

Dä Blog hani scho mau postet, aber irgendwie ischer nöime häre verschwunde, drum nomau:

Nachdäm mer am 6i am Morge ufene Bärg gloffe si für dr Gipfu vo däm Everest z gseh (was zum Glück klappet het..:D) heimer üs ufe Rückwäg gmacht. Wüus viu bärgab isch gange simer rächt schnäu gsi. U so simer du geschter Aabe z Lukla aacho. Das isch dr Schlusspunkt vo üsem Trekking gsi. Zum mim Package het nämlech no ä Flug ghört. Dr Flughafe z Lukla giutet aus dr gfährlechscht vor Wäut. D Startbahn isch schreg am Hoger u nume chli meh aus 500m läng. Am Ändi geiz öppe 600m abe 😅 Dämentsprächend bini rächt närvös gsi für d Rückreis. Mir hei am 6i am morge müesse dert si. Isch sehr ä härzige Flughafe 😀 Für d Sicherheitskontroue heisi keni Grät, si taschte eifach chli ab. Wüume nid dr ganz Tag vo dert us cha flüge (wägem Wätter) gö am Morge früeh grad mehreri uf z Mau. Es isch natürlech aues guet gange, u dr Flug het sogar rächt gfägt. Ä sehr waggeligi Sach zwar, aber das hets no luschtiger gmacht 😁 Iz bini wider z Kathmandu im Hostel u wische mii u mini Chleider (bzw. lani die la wäsche, säuber chame niene). Morn Morge reisi de mitem Bös uf Pokhara.