Ändlech dobe

I ha dä Blog geschter gschribe u när nid chönne poste, iz mani aber d Zyte uso nid ändere. Drum bim läsä eifach vorschteuä es wär no geschter 😬

Sit üsem Akklimatisierigstag z Namche simer scho wider vier Täg gloffe. Im Vergliich zum erschte Teil hei sech aber es paar Sache g‘änderet. Mittlerwile hets tatsächlech ou no angeri Lüt ungerwägs, u d Hotels/Teehüser si am Aabe aube fasch vou. U das obwous hie obe zimlech grossi Ungerkünft het. Am Aabe chli ume Ofe z hocke u mit Lüt us dr ganze Wäut z ploudere fägt aber sehr 🙂

Nach Namche heimer de uf öppe 3800m oderso doch no d Boumgränze überquert, sit denn füuts sech nomau chli bärgiger ah.

Und es het viu Yaks, i dere Höchi chöi die besser schleppe aus d Eslä.😁 Aber di cheibe Yaks si nid nume zum Transport gäbig, es git o feine Chäs. Und: sitmer über 4000 Meter si, isches würklech arschchaut sobaud d Sunne wäg isch. Geit wit unger 0 Grad ir Nacht, sobaud d Sunne da isch, isches aber sehr aagnähm. Und am Aabe düesi i dä meischte Hotels aube im Ässruum iifüüre, dasme sech vorem schlafe chli dert cha go wermä. Wie aber füüret mä, weme ke Houz het? Da chöme d Yaks wider iz Spiu. Dene ihri tröchnete Fläde chame super vebrönne, u si gäbe sogar lenger warm aus Houz. Und nei, es schmöckt nid 😁

Bis uf 4700 Meter isch aues tiptop gange für mi, hetsech nid viu angers aagfüut aus wandere ir Schwiz. Womer geschter aber uf 4900m si aacho und dert übernachtet hei, hani d Höchi de doch chli gmerkt, i ha chli Chopfweh übercho. D Bsitzerin vom Hotel hetmer de ä Chnoblisuppe zum Znacht drzue gsteut, das söu schiins häufe. Z Chopfweh isch de o ersch ir Nacht widercho, wüu schiins dr Körper im Schlaf z Schnuufe nid so cha stüre und mä drum zweni Suurstoff überchunnt hie obe. Auso macht eim dr Körper Chopfweh u weckt eim so zum Schnuufe 😂 Zum Glück hani aber doch nid schlächt gschlafe. Hüt übernachte mer uf 5180 Meter – Gorak Shep isch di letschti Siedlig vorem Everest. Und yes, dämentsprächend heimer ou üses Ziu erreicht! Vo Gorak Shep louft me no öppe e Stung bis zum Everest Base Camp. Natürlech heimer dert chli müesse fötele, und säubschtverständlech hani o für angeri Föteli gmacht – zytewiis hani drü Handys ir Hang gha u hätt mit aune söue Fötele. U de heimer no amne Aatrag zuegluegt – wüus Dütschi si gsi, hanis sogar verstange. Und si het ja gseit ☺️ Zwöi Sache woni nid gwüsst ha über das Base Camp: We niemer geit go chlättere, was im Novämber offebar säute isch, de isch eifach nüt i däm Camp, permanänti Sache hets keni. Und, wasmi dütlech meh erstuunt het: Dr Everest gseht me vo dert us nid!😂 Drum loufe mer morn no ufne chliine Bärg hie ir Nechi, wome nä de sött gseh. U när geits scho wider a Abstiig. Chli schad, aber bezüglech dr Höchi o nid dumm. Z loufe isch würklech viu aasträngender hie, und es füut sech düre Suurstoffmangu mängisch fasch so ah aus obme chli beschwipst wär. Aber sowou das wi ou z liechte Chopfweh zwüschedüre sige normau, solang me glich no mah – u das tueni definitiv 😁 Isch es super Workout das Trekking. Mittlerwile bini o bärguf schneuer wordä. Und mir hei aube es rächt guets Tämpo, so chöimer d Zytaagabe ufde Schiuder aube grosszügig haubiere oder sogar drittle 😁