No chli dra gwöhne

Kathmandu isch definitiv ä spannendi Stadt. I bi aber no nid a aues gwöhnt – ohni öpper uf d Strass z gah und öppis iizchoufe isch scho es Abentüür für mi. Es chöi lang nid aui Änglisch, mä verirrt sech sehr schnäu, aui wei eim öppis verchoufe.. Mitem Abi hani no es paar Tämple aagluegt. Di meischte si buddhistischi Stupas, mir si aber o i gröscht hinduistisch Tämpu vom Land. Dert hetnis ä angere Guide aues zeigt. Chli überforderet bini gsi woner mer zeigt het wi si Lüt uf offnigem Füür kremiere. Süsch isches aber sehr spannend gsi, dr Guide het viu interessants über ihre Gloube und ihri Ritual verzeut. Es angers Highlight isch z Taxifahre hie. ÖV gits nid viu, drum drfür umso meh chlini Taxis. Di freesä zimlech schnäu dür di änge Gasse und überhole links u rächts – oder wärde überhout. Drzue wird vo aune fliissig ghuupet. Während der Fahrt hani erfahre, dass Fuessgänger*inne 15‘000 Rupie (= öppe 120 Franke) brchöme, we si vomne Töff berüehrt wärde. Das Gsetz söu drzue biitrage, dass Töfffahrer*inne chli besser luege 😁 Mi dünkt dr Verchehr funktioniert eigentlech Rächt guet. Für mi isches zwar u schwirig dr Überblick z bhaute, aber d Nepales*inne heis rächt im Griff 😎

Hüt heimer üs uf z Trekking vorbereitet. I ha zum Glück nid so viu müesse choufä, wüui z meischtä scho drbi ha gha. Morn steit de ä längi Outofahrt ah, schiins öppe 15 stung. Drum fahre mer scho am 4.30 los.