Mittlerwile simer sit 5 Täg ungerwägs und hei hüt grad Namche Bazaar erreicht, das isch ä chlini Stadt uf 3440 Meter. Füut sech aber no nid so höch ah, wüu hie d Landschaft ganz angers isch. Es het z.B. ou no viu Böim da obe. Z Stedtli isch rächt härzig, und es het würklech nomau aues hie: Usrüschtigs- & Elektrogschäft, Läde, Bars, Restaurants, Hotels, Beckereiä, Banke,.. Und hie hani o widermau WLAN 😁 Z zäht simer vor vier Tag 13h mitem Jeep vo Kathmandu i Himalaya gfahre – düre ängi, stotzigi Bärgwägli, Flüss und querfeldein. Het rächt gfägt – ömu weni aube vore ghocket mi. Mir hei drum geng chli abgwächslet, hinge ischme zimlech iiquetscht gsi 😀
Z Trekking heimer z Phaplu gstartet, das isch vier Täg vorem Startpunkt wo di meischte näme. Drum heimer während dä erschte Täg nid viu meh gseh aus Esukaravane (seit me däm bi Eslä so?🧐) und paar iiheimischi Lüt. Dä Eslä muesme chli usem Wäg stah, di luege nämlech nid wosi häre tschaupe. Mängisch isches o eifach sehr äng uf dene Bärgwägli. Mir loufe zwüsche 4 u 8 Stung pro Tag, und wüus fasch immer ufe und abe geit, isches rächt aasträngend. Z Uf u Ab sött drfür sorge dasi d Höhechrankheit nid brchume – düre Tag müglechscht höch ufe und amne töifere Ort go schlafe. Für das hets überau Teehüser, das si chlini Hotels am Wäg, meischtens im Wohnhuus vode Lüt. Dert brchunnt me für 1-4 Franke es Zimmer mit Bett – zwar ungheizt, aber mit Schlafsack u Chappe geit das tiptop. Im Ufenthautsruum hets meischtens e Houzofe, dasme ar Wermi cha Znacht ässe. Usere meischtens rächt usgibige Charte chame vo Dal bhat über Pizza bis zu Pasta fasch aues wähle. Z Ässe wird früsch gmacht und isch eifach geniau!😁 Dal bhat und Momos chönnti bis zum abwinke ässä.
D Landschaft isch sehr ungerschidlech, mängisch fasch wi im Dschungu, zum Teil sehr alpin oder de o grad wider nid. Schön isches ömu sowieso ☺️ Leider chani mitem Wifi hie keni Biudli ufelade, vilech schaffi das speter no 😬