Dr Flug vo Dubai isch sehr aagnähm gsi und i ha sogar öppis zässe brcho ungerwägs 😁 Nach der Landig hets es riise Gedränge gäh am Flughafe, i ha geng wider müesse aastah und lang warte. PCR-Tescht zeigä, Impfig zeigä, Passkontroue, Visum zahle, PCR-Tescht zeigä, Visum ussteue, Sicherheitskontroue, PCR-Tescht zeigä, Gepäck abhole, PCR-Tescht zeigä. Richtig, dr Tescht muesme vier mau zeigä 😂 Het aber aues super klappet und i bi am Flughafe abghout und iz Hostel gfahre worde. Zur Begrüessig hani es erschts mau Tee brcho, dä steue si eim hie immer wider häre. Sehr süess, aber fein 🙂
D Lüt hie si würklech sehr nätt. Sie vom Hostel hei mer viu erklärt und dr Chef hetmi zum Zmorge iiglade. I hane nach Tipps fürnes Trekking gfragt, und är hetmer aabote eis mit mir zäme (bzw o für mi) z plaane. Und de heter dr Abi ghout, dä isch usbiudete Guide. U wosimer verzeut hei wasme aus cha und mer Biuder zeigt hei, hani mi derzue la ermuetige, zum Everest Base Camp z loufe – das ligt uf 5‘300m. Mit Aa- und Abreis und Täg zum akklimatisiere geits 15 Täg – und mir starte am Zischti. Bi gspannt!😋
Am Nami het mi dr Abi de no mitgnoh dür d Stadt – mir si dr Affetämpu und paar angeri Tämple go aaluege und är hetmer verschidnigi Stadtteilä zeigt. D Strasse si rächt äng u vou mit Läde, Lüt, Töffe und Outos. Da muesme zimlech ufpasse weme umelouft. Und überau hets Hüng, mängisch sogar Affe 😁Und es louft überau öppis. Mir si de no imne Rooftop-Restaurant go Momos ässe, di si ächt hammer fein hie.
