Ungerwägs

Das cheibe Flüge isch am Aafang auso no chli überforderend gsii für mi: Wo muesi häre, was mache, was fürenäh… isch würk ä ganz angeri Art z reisä aus mitem Zug. Und ehrlechgseit hani dr Zug scho ufem erschte Flug vermisst!😂 Z Berlin am Flughafe si d Lüt luschtigerwiis scho zimlech aagstange bim Check-In, o wes nonid offe het gha. Auso hani mi o mau id Reihä gsetzt. Bevor si z Check-In hei uftah heisi aber nomau di ganzi Schlange umorganisiert, u so bini plötzlech rächt wit vore gsi. Drfür isch z Check-In es einzigs Desaschter gsi. Über d Heufti vode Lüt (inklusive mir) heisi zersch nid iz Flugi wöue lah, wüu schiins Dokumänt gfäut hei oder nid ir richtige Form si da gsi (wome aber weder füre Flug no für d Iireis nach Dubai brucht.. – si hei zwar geng gseit es sig nötig für Dubai, das het aber nid gstumme). Vo „unvouständige“ Versicherigsbestätigunge über fauschi Check-In Methode bis zu nid usdruckte Bestätigunge (wo wörtlech drufgstange „Valid as mobile pass“) – si hei würk bi fasch aune es Problem gfunge. D Stimmig isch dämentsprächend hitzig gsi 😂 Uf mim PCR-Teschtzertifikat vo Dänemark isch leider nid explizit „PCR“ gstange sondern öppis mit Nucleid Amplification blabla was ou ä PCR-Tescht isch. Das hani de probiert z erkläre und mit Google z bewiise, het aber nüt gnützt. Nach ewigem Warte isch du dr „Supervisor“ vor Airline cho u dä hets de verstande. Glück gha! Angeri hei tatsächlech nid chönne mitflüge. U wüu z Check-In so lang isch gange, simer de o e gueti Stung z spät abgfloge. Näbscht mir si eigentlech nume ü50 Dütschi ufem Flug gsi, gö äuä iz aui ä Wuche i ihres Resort z Dubai 😉 I ha z Glück gha, dasi ä ganzi 3er Reihe für mii allei ha gha, so hani sogar zimlech guet chönne schlafe 😁 Pünktlech zum Sunneufgang u zur Landig z Dubai bini ufgwacht. Und woni bi usgstige bini fasch id Schnitz gheit, nach 6 Wuche Skandinavie bini nid a 30° am Morge am 6i gwöhnt 😂 Dusse brätlets eim fasch, dinne düesi so fescht chüehle dasi ä Pulli bruche. Hie am Flughafe isch aues chli komplizierter für mi aus z Europa, da chani nüm eifach mit mire ID dürehusche. Drfür drücke si eim zämä mitem Pass ä gratis Simcharte mit 1 GB Internet id Hang. Mittlerwile hani aui Kontroue gschafft (und aui Iireisedokumänt richtig usgfüut und ir richtige Form drbi gha) u warte uf mi Flug uf Kathmandu. Und i fröie mi sehr ufnes Bett hüt Aabe 😅