Tschüss Schwedä

Di letschte drü Täg hani z Höllviken verbracht, das isch öppe 30 Minute südlech vo Malmö und ligt ufere Haubinsle. S het vorwiegend nobli Hüser hie, Hotels und Feriewohnige giz nume vereinzelt. Di meischti Zyt hani am Strand verbracht, z Wätter isch nämlech usnahmswiis sehr guet gsi 😁 Vorgeschter bini no mitem Bös uf Trelleborg, das isch ganz ir Nechi. Uund es isch di südlechschti Stadt vo Schwede. Vor über 5 Wuche bini dert am Morge früeh mit der Fähre vo Rostock aacho. Wüus denn natürlech no dunku isch gsi hani dänkt gani mer das Stedtli mau bo bi Tagesliecht go aaluege. Mega viu z gseh giz nid, z Touri-Highlight isch äuä di zumne viertu wider ufbouti Wikingerburg – vo dert chunnt o der Name Trelleborg. Und so hani de mi Kreis z Schwede gschlosse.

Geschter bini de mitem Velo no über bzw. um di ganzi Haubinsle gfahre. S het viu Naturschutzgebiet und Velowäge. Ungerwägs hani viu schöni Stränd gseh u bi ines Gwitter cho – wider mau pflotschnass. Dä Stränd entlang hets überau so chliini farbigi Houzhüsli. Mini Gaschtgäberin het mer de am Aabe erklärt, dass nume iiheimischi Lüt die dörfe choufe und si dert inne ihri Badsache usoo lagere. Am Nami bini de no es Zytli am Strand ghocket, ha Glace gässe und gsünnelet. Fasch wi Summerferie!😁

So, und iz geits tatsächlech witer. Nid öppe dasmer Schwede z längwilig wär worde, im Gägeteil. I hätt no sehr lang chönne dert blibe, es git geng no so viu woni nonid ha gseh. Generell gfaut mer Schwede eifach meeega guet, i ga sicher glii wider mau ☺️ Für di nächschte Wuche ziehts mi iz aber no chli witer wäg. Iz bini mau uf Kopenhagen überegfahre, da blibi no e Nacht. Ungerwägs z Malmö bini no di letschte Impfige go mache, iz choufi z Kopenhagen no aui Medikamänt, woni zur Sicherheit mitnime. Und de bini vori no ä PCR-Tescht (z Dänemark si die sogar für d Touris gratis!🤩) go mache, wüu o gimpfti Lüt eine bruche für uf Nepal iizreise. Und genau das hani vor 😁 Morn Nami startet d Reis uf Kathmandu. Ufem Landwäg isch d Reis aktuell leider nid machbar, wüu verschidnigi Gränze no zue si und viu Verbindige vode Nachbarländer uf Nepal nonid wider fahre. Drum nimi iz z Flugzüg. I bi scho sehr lang nüm gfloge, drum hani doch no zimlech Respäkt vor dere Reis. Usserdem isches scho so lang här, dasi no gar nie säuber ä Flug buechet ha. Das isch wituus komplizierter aus i dänkt ha! Mit dene dynamische Priise und unmügleche Algorithme hani wit überne Stung bruucht für ä gueti Verbindig mit müglechscht weni Zwüschehaute z finge. Morn geits zersch uf Berlin, vo dert uf Dubai und vo Dubai uf Kathmandu, d Houptstadt vo Nepal. I bi rächt ufgregt, fröie mi aber o sehr uf dä zwöit Teil vo mire Reis ☺️