Geschter hanimer am Morge widermau ä Wecker gsteut und bi a Hafe gloffe. Vo dert hets regumässig ä Fähre übere uf Dänemark. D Überfahrt geit zwar nume 20 minute, git aber trotzdem z voue Programm. Duty free shop, Ässensbuffet und Bar. Ha auso gstuunet was d Lüt uf sore churze Überfahrt möge ässä u trinke 😂 Aber zumne chline Glas Prosecco hani mi de ou la überzüge.
Helsingør isch ganz es härzigs Stedtli, leider aber so dermasse vougstopft mit Touris, dasi mi nüm ganz so wou gfüut ha 😁 U o im Stedtli wider: Alkohol und ässä. Ha aber nid ganz usegfunge, obs Schwed*inne oder Dän*inne si – näbscht au de Dütsche natürlech.
Aus nächschts bini no z Schloss vo Helsingør go aaluege, das isch sehr iidrücklech gsi. Leider hani mi Tag de chli früecher müesse beände u zrügg uf Helsingborg fahre, wüui vor zwöite Typhus-Impfig so feschti Buchchrämpf ha bercho. Aber immerhin hani no ä schöne Sunneungergang vom Schiff us gseh ☺️ Iz geits mer scho wider besser und i bi ufem Wäg zu mire letschte Destination, bevor i de am Donnschti witerreisä.
Lieber Schlossherr,ich bin froh, dass es dir wieder besser geht. alles Gute und viele liebe Grüsse Grosi