Di letschte drü Täg hets öppe durchgehend grägnet. I ha zwar ä gueti Rägejagge und ou dichti Schueh wider wüsst – wüus aber abeächsligswiis vo aune Richtige us grägnet het, hani de doch nid so Luscht gha ufnes lengers Outdoor-Programm, drum hani mi für d Indoorvariante entschide. Di isch für einisch mau chli angers gsi aus süsch aube: I bi uf Helsingborg gfahre u dert ines Impfzäntrum. Langsam aber sicher ziehts mi nämlech wäg vo Europa. Wo häre verrati a dere Steu iz mau no nid 😉 Uf jede Fau bruchi für mis Reiseziu no vier Impfige. Je eini pro Arm u de no zwöi, wome mues schlücke. Wüume da schiins guet mues druf achte dasme 1h vorhär u nächhär nüt isst u trinkt, und ig am Aabe ufem Heiwäg scho zimlech Hunger ha gha, hani dä Cocktail haut im Bös aagmixt. Aber d Blicke u d Frag, obi da Droge mische, sis mer wärt gsi, när deheime chönne z Ässä 😁 Wüuimer aber a eim Tag grad drü Impfige ineglah ha, bini de am Aabe chli flade gsi. Aber lieber hie chli müed u fiebrig si aus irgend sone blööde chäfer ufläse.
Mittlerwile bini sogar uf Helsingborg witerzoge, wüusmer da so gfaue het. Geschter hets dr ganz Tag sehr fescht gluftet, s het mi fasch wägblase. Ar Küschte (wome bis uf Dänemark gseht) bini a eire Stei würklech fasch nüm vom Fläck cho, wüui so starche Gägewind ha gha.
Für einisch isch mini Ungerkunft nid so gmüetlech, drum verbringi mi Morge lieber im Espresso House, wome für zwöi Franke so viu Kafi cha trinke wi me ma 🤩
Liebe Kai.giits dr umhi guet? i hoffes.I bi ja scho gspannt wohäre dass es di no luftet. Häb Sorg zue dr. Alls Guete u ganz liebi Grüess Grosi