Ockelbo

So guet hani auso no nie gschlafe im Zug. Dämentsprächend hani zwar nüm müesse nacheschlafe, aber i bi glich froh gsi, dasi scho am Morge mini Ungerkunft ha chönne bezieh – d Yellow Cabin 😁 Sehr gmüetlech da. Und es ghört wider es Velo drzue, da hani ja bekanntlech immer Fröid.

Ockelbo isch es härzigs Provinzstedli, vor Grössi här vergliichbar mit Aarbärg. Und meh per Zuefau hani ä Schwümmhaue mit Sauna entdeckt, u di bini de ga teschtä. Isch auso es spannends Erläbnis gsi. Ire Haue ohni Tagesliecht, dekoriert mit farbig lüchtende Chuglä, si näbscht mir öppe 15 Lüt ü60 zu peppiger 80er Musig hingerenang ihri Bahne gschwumme 😂 Drbii bini immer wider aaquatscht wordä – schwümme isch gloub nid aune ihri Priorität gsi. O ir Sauna hei mi aui usgfragt über mis Läbä und mini Reis. Und de hani mi de no chli erkundet was Ockelbo so z biete het – wi erwartet nid so viu 😉 Ä schöne See, irgend ä Garte,… Am Aabe hani mer de es traditionell schwedischs zNacht kochet – wobii z Gmües gloub nid sakrosankt isch und mini Køtbullar vegetarisch si gsi 😁

Dä Garte isch offebar irgend es Projekt, aber i ha nid würk usegfunge, was genau d Idee drhinger isch. Schön hets zum Teil usgseh, und i cha iz immerhin sägä, dasi ir lengschte Chifereallee vor Wäut mis Picknick gässä ha 😁 Iz machi mi de no ufe Wäg a See für z Apéro.