Yoga am Fluss

Di letschte drü Täg hani amne sehr spezieue Ort verbracht. Ir nechi vo Söderköping hani im Waud imne Zäut gschlafe – aber rächt es luxuriöses, mit Bett und Liecht. Sehr gmüetlech, und ir Nacht weniger chaut aus erwartet 😁 Das Ganze isch Teil vomene grosse Aawäse am Götakanal – ä Kanal, wo einisch quer dür Schwede geit u so d Wescht- u d Oschtküschte mitenang verbindet. Mitem Ruederboot und de Kayaks hani nacht Luscht und Luune ufem Fluss chönne desumefreesä, wasi natürlech so viu wi müglech gmacht ha.

Es euters Ehepaar betribt uf däm Aawäse es Yoga-Zäntrum. Beidi sisi scho viu z Indie gsi und hei sech im Kundalini-Yoga la usbiude. Wüus geng nöime öppis z tüe git, heisi regumässig Workawayers (Lüt, wo bi ihne schaffe u drfür dört dörfe wohne und ässä). I bi de geschter mit zwöi Argentinierinne und ere Niederländerin es Huus go abbrotze. Ke Witz, si wei es Huus wo nöime nüm brucht wird bi ihne ufsteue, auso simers go usenang näh. Das het zimlech gfägt, u so heimer das i zwo Stung gschafft. Nachemne Bootstürli am Nami hani de am Aabe am Yoga teilgnoh. Isch rächt e kuuli Erfahrig gsi für mi. Isch zwar sehr spirituell gsi, aber aus i auem hets würklech Spass gmacht. Nachem Yoga heimer de no Znacht gässä und dr Aabe zämä verbracht. Isch würklech schön gsi, au di Lüt lehre z kenne. Dämentsprächend wäri gärn no chli lenger dert blibe. ABER: Es steit es grosses Highlight vo mire Reis bevor. I verlah hüt nämlech Schwede und fahrw uf Kopenhagen, woni dr Dave für paar Tag triffe ☺️