So, fertig wandere z Abisko! I wär zwar eigentlech gärn no chli blibe, aber da z Wätter gchehrt het hani weder d Ussicht uf Nordliechter no uf schöni Wanderige. Geschter bini gäge Schluss vo mire Wanderig sogar ou no i Rägä cho u ha fasch müesse seckle, dasi nid komplett nass iz Hostel bi cho. Wobii, d Füess si eh scho nass gsi. I ha zwar iz mini wasserdichte Wanderschueh ändlech chönne bruuche – aber weme sech a Rentier wott aaschliche und me drbii i Sumpf steit u bis fasch zude Chnöi versinkt, si d Füess haut de glich nass. Am Aabe hani mi de ir Sauna chli chönne ufwermä.
Und iz bini z Boden, das isch ganz ir Nechi vo Luleå (woni vorere Wuche bi gsi). Hie bini aber nume für vier Stung, wüui när mitem Nachtzug wider chli i Süde vo Schwede fahre. Dert sött z Wätter nämlech besser si. Wüus dasmau nid sone tolli Aktion wi letscht mau gäh het, verbringi d Nacht „nume“ ufemne Sitz, aber das bini mer ja ou scho gwöhnt 😁 Bevor dä Zug aber abfahrt, muesi hie z Boden no warte. Und leider isch d Stadt nid würk ä Hingucker und rägnä duets ou no. Schowider nassi Füess, ha dänkt di dünne Schueh si besser zum reisä. 😂 Für mi ufzwermä bini ä Pizza go ässä – imne Restaurant, wo ä Interlakner hie eröffnet het. Und i zwo Stung fahrt de ou scho mi Zug 🙂
Liebe Grüsse Dori