Sit geschter bini ja iz z Abisko. Hie giz nid würklech viu – Hostels, ä Lade, paar Hüsli und ä Bahnhof. Drfür isches umso schöner, vorauem natürlech dr Nationalpark. Geschter hani nur ä Spaziergang drdür gmacht u bi ufnes nachebouts Same-Dorf gstosse. Plötzlech hets du zimli fescht aafah Lufte und i ha Angscht bercho, dasmer ä Birkeascht ufe Chopf tätscht, drum bini när no a See und bi de dert entlang zrüggloffe. Am Aabe und ir Nacht hets du witergstürmt und grägnet.
Hüt isch de zum Glück d Sunne wider fürecho u de bini zersch chli im Flussdelta ungerwägs gsi und ha mer mit Steine dr Wäg dür d Bächli boue. När bini no dürne Tour düre Nationalpark und de zrügg zum Hostel. Ufem Wäg zrügg – dir gloubets nid! – hani im einzige Lade hie ir Nechi mini Wanderschueh chönne go abhole (Päckli wärde hie im Norde nid gliferet, es git nume paar Abholpünkt, zum Teil 100km usenang😂)! Ändlech! Innerhaub vore Wuche heisi tatsächlech dr Wäg vo Rostock bis hie obe gschafft. Ab Morn bini de bim wandere no besser usgrüschtet u brchume hoffentlech nüm geng nassi Füess. Hüt Aabe het dr Hostelbsitzer d Sauna aaglah u di bini natürlech go teschtä.
Liebe Kai, du bisch e Glückspilz,nit nume wäg de Schueh!So viel Interessants darf du erläbe,da bin ig dankbar.Du machsch es aber o guet,äbe a la Kai!,,,Hie isch es nass u chalt,obeni bis 1300 m wotts schniie.Gruuuuusig.Aber inisch chunnt de scho umhi d Sunne.I wünsche dr dass si o bi dier schiint.Alls Gute u liebi Grüess Grosi ❤️
Hei! Gniesses, wett o grad wider zrügg! Und nid zviel Süesses choufen im Lade, gäu! Lg mirtile