Ungerwägs i de Fjorde

I ha auso tatsächlech Nordliechter gseh! Gseht würk kuul us, isch aber umso schwiriger zum fötele 😉 Geschter hani am morge eigentlech grad wöue go loufe, da isch dr Sohn vor Vermieterin cho und het mer ä Outoschlüssu id Hang drückt. „Hie, für go iizchoufe oder für Narvik go aazluege.“ Dr international Fahruswiis het sech auso glohnt (o weni dä hie äuä nid brucht hät, aber i rede mers iz vorerscht ii). So hani mis Programm abg‘änderet u bi iz Zäntrum vo Narvik gfahre. Mitemne frömde Outo ire Stadt woni nid kenne – dir chöitnechs vilech vorschteue. Und bis i ä Parkplatz gfunge ha woni ha chönne drifahre, isches ömu es Zytli gange!😂 D Region hie isch ja wahnsinnig schön, Narvik säuber het aber nid viu z biete. Säge si im Tourist-Büro so – i bi z erschte mau uf mire Reis uf sone Info, wüui ächt nid gwüsst ha wasme da cha mache. Dr Hafe mit dä grosse Schiff u dr chliner Hafe mit dä Böötli si ömu kuul gsi zum aaluege. När bini no iz Chriegsmuseum. Das isch würklech grandios gsi. Wi dr zwöit Wäutchrieg z Norwege isch gsi, hani nüm i aune Details presänt gha. Und i bi rächt fasziniert gsi drüber, wi d Norweger*inne d Gschicht i viune einzelne Beriiche und us verschidnige Perspektive (o sehr säubschtkritisch) ufgschaffet und när präsentiert hei. Sicher nid abschliessend, aber doch ufne Art wo mi sehr beiidruckt het. O dr chli agspaced Schlussteil, wo quasi ufne Metaäbeni geit und id Zuekunft luegt, het mi rächt packt.

Hüt bini de go wandere. Wüui nid würk ä Wanderwäg ha gfunge bini eifach mau losgloffe. Nachdäm i zersch rächt ha müesse chlättere bini im zwöite Teil vorauem über Moos gloffe. Zum Schluss bini no mitere Ussicht übere Fjord belohnt worde – bis i de aues wider ha müesse zrüggloufe 😁 Vorhär hani aber no chli ufem Moos pöiselet.