Uf der Erzroute

D Zugstrecki vo Luleå bis Narvik isch ursprünglech füre Transport us dä Erzmine z Kiruna und ir Nechi vo Gällivare a di beide Häfe boue worde. O hüt wird z Isäerz no mitem Zug verfrachtet, u zwar mit uuu länge Züg. Di si mehreri hundert Meter läng. Ig ha de glich dr Personezug gnoh 😁 Dä het de immer wider müesse warte, wüuer sone Güeterzug het müesse dürelah. Di hei nämlech Prioriät. D Strecki isch wunderschön, u so hani usnahmswiis bim Zugfahre nid würk gläse, sondern fasch di ganze sibe Stung usem Fänschter gluegt. I derä Zyt si verschidnigi Landschafte a mir düregruuschet. Vo Waud über Bärge bis zur karge Landschaft ganz im Norde. Leider fahre d Züg momentan nid über d Gränze, Narvik isch zugtechnisch abgschnitte. U ir letschte Stung Fahrt, vo Abisko bis Riksgränsen (wime am Name gseht z Gränzdörfli😉) bini de sogar ganz allei im ganze Zug gsi. Zum Glück hani chönne organisiere, dass mi dr Sohn vo mire Vermieterin mitem Outo isch cho abhole, so hanis de doch no bis uf Narvik gschafft und är het no hurti z Schwede chönne go Tabak choufe. Churz vor der Gränze zu Norwege hets ä Lade, wo fasch usschliesslech Norweger*inne iichoufe – eifach wüus sech für sii finanziell lohnt 😁

Vorem Znacht bini de no chli go d Gägend erkunde. Und iz machi mi de uf d Jagd nach Nordliechter. Lut dä Date woni uf verschidnige Website ha gfunge chönnts die Nacht tatsächlech gäh. Mau luege, obi scho am erschte Aabe öppis gseh 🙈