Geschter und hüt hani Luleå erkundet. Wi i die meischte schwedische Stedt biudet ä Fuessgänger*innezone z Zäntrum vor Stadt. Dert giz vorauem Chleider-, schrecklechi Deko- und Schläckzügläde. Am Ändi vor Stadt giz ä chliini Haubinsle, wome chönnt bade. Früecher isch dert dr Hafe gsi, aber wüu z Land in ganz Norrbotten geng höcher wird, hei si dr Hafe müesse verschiebe – necher ad Küschte.
Wüu sech d Landschaft hie permanänt chli lüpft, hei si vor öppe 400 Jahr di ganz Stadt Luleå verschobe, wüu dr Handu per Schiff sehr wichtig isch gsi und si ä nöie Hafe hei müesse boue. Gamlastan (=Autstadt) isch mittlerwile UNESCO-Wäutkulturerbe. Um d Chile ume hei si vor 400 Jahr chlini Hüttli boue, dass d Lüt vom Land, wesi i Gottesdienscht si, dert hei chönne übernachte. O hüt si d Hüsli gröschteteils unbewohnt unger dr Wuche, d Lüt chöme nach wie vor vo ganz Lappland ad Gottesdienschte und übernachte i ihrne Hüttli um d Chile. Z Freiliechtmuseum het leider zue gha (i bi würk rächt off-season ungerwägs, merki geng wider), aber düreloufe hani glich chönne. Und weni uf de Biudli gseh, wi viu Lüt aube im Summer da si, chani gloub froh si, dasi nid ir Houptsaison bi cho. Di aute Hüsli si ächt härzig, und mit de Infotafele hani glich rächt id Gschicht chönne iitouche.
Ir letschti ischmer z Wort „fika“ geng wider begägnet. Wüu i viune Läde di süesse Gebäck geng mit „fika bröd“ aagschribe si gsi, hani geng dänkt das sig eifach „normaus“ kafigebäck. Woni de chli googlet ha, hani gmerkt, dass dert viu meh drhinger steckt. Fika isch quasi ä schwedischi Tradition, eigentlech sogar ä fixe Punkt ufem Tagesprogramm. Z Ideal vode Schwed*inne isches, dass si sech einisch pro Tag, und zwar egau ob si frei hei, am schaffe oder uf Reise si, Zyt nähme für Fika. Es Kafi trinke, öppis ässe und Zyt mit Fründ*inne verbringe. Würklech ä Uszyt vom Tag. Wird ou i grosse Firme praktiziert. Di Tradition dünkt mi sehr schön (und wichtig), drum hani das natüürlech ou usprobiert ☺️
Morn steit wider es Highlight ah. I fahre mit der Erzisebahn vo Luleå bis uf Narvik. Wobii d Züg im Momänt nid uf Norwege dörfe fahre. Aber i ha zum glück ä liebi frou gfunge womi ar Gränze abhout und uf Norwege fahrt ☺️