Velofahre

Geschter bini mitem Velo loszoge, für d Gägend z erkunde. Natürlech hets widermau grägnet 😞 Das het mi aber nid dervo abghaute, ume See ir nechi z fahre. Okei, är isch zwar nume öppe so gross wi der Murtesee, aber mit aune Verzweigige und wüui mi duurend verfahre ha, hets de doch es zytli brucht. Ungerwägs hani aber öppe die es Pöiseli gmacht, wüus so viu schöni Orte gäh het für chli z läse oder eifach ufe See z luege u z gniesse. Dr „Velowäg“ isch sehr viusitig gsi – mängisch tatsächlech e schöne Velowäg düre Waud, ab und zue hani aber o uf der Outobahn oder dürne Bousteu müesse fahre.

Hüt bini wider mitem Velo loszoge, Ziu isch dasmau ä Archäologie-Wanderwäg gsi. D Aafahrt isch du lenger gange aus dänkt, wüu si d Velowäge hie chli irgendwie boue hei und me zimlech mues luege, dasme de würklech o dert häre chunnt wo me wett. Ungerwägs hani immerhin ändlech mau es Rentier gseh, leider bini z langsam gsi zum fötele. Bim wandere hani fasch nid gnue brcho vor Landschaft, es isch würklech u schön gsi. Di archäologische Fundstück si drfür eher mässig gsi, bis uf paar Steihügle, wo Grabstettä söue si, und emne Steilabyrinth hets nüt z gseh gäh. Und i ha chli mini Zwiifu, ob das würklech ächt isch gsi. Aber das Ganze isch im Momänt no bir Archäologin meines Vertrauens im Prüefstand 😁 Uf de Schiuder isch gstange, dass di Grabstettä ir Bronzezyt, öppe 1600 vor Chrischtus errichtet si worde, dennzumau diräkt am Meer. Wüu sech d Landschaft hie aktuell pro Jahr um öppe 1cm erhöht, ligt das ganze iz natürlech nüm diräkt ar Küschte. Di beschti Ussicht hani vomne Hügu gha wo, häbet nech fescht, 80 Meter über Meer ligt. aber das längt hie scho fürne grandiosi Ussicht. Im Ändeffekt het di ganzi Wanderig de doch öppe 3.5h brucht. Mit im gsamte 4h Velofahrt bini iz doch rächt gschluuchet – fürnes Apéro am Fluss, woni für mii uf d Ehe für aui aagstosse ha, het d Energie ömu no glängt ☺️