Ab i Norde

Chli verlore bini vorgeschter am Morge z Lidköping am Bahnhof gstange – z Hüsli abgäh, dr Zug fahrt ersch am Aabe und dr ÖV rings um Lidköping isch ufem Chopf gstange. Züg si usgfaue u de doch gfahre, Ersatzbösse si entweder gar nie oder 10 Minute z spät abgfahre u d Liniebösse si sowieso chli Freigeischter gsi. Mit viu Konzentration, es paar Umwäge und viu unschuudid Lächle, wüu mis Interrail uf dene Bösse gar nid guute hät, hanis de uf Mariestad gschafft. Dert hani mer di schöni Autstadt aagluegt u bi när ufere zwe Meter breite Landzunge öppe 2km i Vänern usegloffe.

Gäge Aabe bini de uf Stockholm gfahre, woni dr Nachtzug i Norde gnoh ha. Z Glück isch uf mire Site gsi, i ha nämlech es ganzes Abteil für mi allei gha. Fasch chli wi im Hotel! Schlafe isch de leider glich chli schwirig gsi, wüu dr Zug aube zimlech starch id Kurve isch gläge, so dases mi i mim Bett geng chli umegschobe het. Am Morge bini drfür mitere bombastische Ussicht gweckt worde – dr Zug isch dür herbschtlechi Wäuder u näb Seeä düre gfahre. Und när no eis vo mine Highlights: Dä Nachtzug het tatsächlech ä Duschi gha! Iz chani Dusche im Zug ömu vo mire Bucketlist striiche 😁 Di Reis het grad einiges veränderet, i bi iz nämlech nid nume ire angere Landschaft, nei, es isch o bedütend cheuter worde. Höchschttemperatur geschter isch 8° gsi. U leider bis iz vorauem Räge. Hüt und vorauem morn söus de schöner wärde. Luege mer mau! Di nächschte zwe Nächt verbringi iz ömu no im Hüttli ir Nechi vo Piteå, uf der Haubinsle Hemlunda, diräkt am Fluss. Mau luege, wasme da aues cha ungernäh! Zum Hüttli ghört ömu wider es Velo. Mit däm bini geschter im gröschte Schiff go iichoufe, natürlech bini pflotschnass worde. Aber erschtens bini mer das ja langsam gwöhnt u zwöitens isch d Velofahrt düre Waud so schön gsi, dases das wärt isch gsi.